Փաստ ինֆո

«Կարծում եմ՝ իրենց համար պատիվ պետք է լինի իջնել և մեզ հետ հանդիպել, քանի որ, նախ և առաջ, մենք ենք մեր հարկերից իրենց վարձատրում։ Բացի այդ, այստեղ հավաքվածներս տվել ենք մեր զավակներին, որ իրենք այսօր այսպես իրենց ճոխ սենյակներում նստեն, շատ վատ կառավարեն, կեղծեն, ամբողջ դատական համակարգն ուզուրպացնեն։ Ի՞նչ ունեն վախենալու։ Եթե մեզնից վախենալու բան չունեն, թող իջնեն»,-ԲԴԽ-ի դիմաց լրագրողների հետ զրույցում ասաց 44-օրյայում զոհված Մենուա Հովհաննիսյանի մայրը՝ Կարին Տոնոյանը։

Լրագրողի հարցին՝ եթե ամեն դեպքում ԲԴԽ-ից ոչ մեկը չիջնի ու չհանդիպի ծնողների հետ, ի՞նչ են պատրաստում անել, տիկին Տոնոյանը պատասխանեց՝ կփորձենք մենք ներս մտնել։

«Ներողություն կխնդրեմ ոստիկաներից, քանի որ ամեն անգամ նրանց մեղքերի ծանրությունը կրում են ոստիկանները, բայց համոզված եմ, որ ոստիկանները, նախ և առաջ, մարդիկ ենք, որոնք ուզում են օր առաջ ազատվել այս համակարգից»,-նշեց Տոնոյանը՝ հույս հայտնելով, որ ԲԴԽ-ում գտնվողներն այնքան խոհեմ կգտնվեն գոնե այս դեպքում, որ այնպես չեն անի, որ զոհվածների հարազատների ու ոստիկանների միջև բախում լինի։

Բարձրագույն դատական խորհրդի դիմաց հավաքված 44-օրյա պատերազմում զոհված և անհետ կորած զինծառայողների ծնողները 10 րոպե ժամանակ են տվել ԲԴԽ նախագահ Գագիկ Ջհանգիրյանին, որպեսզի վերջինս իջնի և հանդիպի իրենց հետ։

«Պարոն Ջհանգիրյան, եթե 10 րոպեից չիջնեք, ապա մենք ներս կմտնենք, և ծնողների ու ոստիկանների բախումը կմնա ձեր խղճին»,-հայտարարեց Կարին Տոնոյանը։

Աղբյուր` Փաստինֆո