Փաստ ինֆո

Մայիսի 25-ին Արցախի ԱԺ խմբակցությունների պահանջով տեղի ունեցած Արցախի անվտանգության խորհրդի նիստին նախագահ Արայիկ Հարությունյանի հայտարարությունն՝ առ այն, որ Նիկոլ Փաշինյանը հավաստիացրել է, թե ՀՀ և Արցախի ժողովրդի թիկունքում որևէ փաստաթուղթ չի ստորագրվելու, ըստ արցախցի պատգամավոր Մետաքսե Հակոբյանի, վստահություն չի ներշնչում։

«Դրան լուրջ չի կարելի վերաբերվել։ Մանկամտություն է հավատալ մեկին, ով մեր գլխին բերել է այս աղետը։ Ինչպե՞ս կարելի է հավատալ մեկին, ով 2019-ին Վերածննդի հրապարակում հայտարարել է, որ Արցախի ժողովուրդն իրեն մանդատ չի տվել, հետևաբար որևէ հարց չի կարող ինքը որոշել և դրանից մեկ տարի էլ չանցած մեր աչքի առաջ հանձնել է Արցախը։ Փաշինյանը դեռևս 2019-ին Դուշանբեում կայացած հանդիպման ժամանակ է կայացրել այդ որոշումները։ Արդեն իսկ տեղի ունեցած ու ընթացող աղետալի գործընթացները Դուշանբեում ձեռք բերված պայմանավորվածությունների հետևանքներ են»,-«Փաստինֆո»-ի հետ զրույցում ասաց Արցախի Աժ «Արդարություն» խմբակցության քարտուղար Մետաքսե Հակոբյանը։

Վերջինիս խոսքով՝ Նիկոլ Փաշինյանն այնպես է արել, որ Արցախում արդեն լուրջ չեն վերաբերում նաև Արայիկ Հարությունյանի ասածներին։

Պատգամավորը չբացառեց, որ ժողովրդի թիկունքում նոր գործարքների անհնարինության մասին հավաստիացումներն ընդամենը ժողովրդին հանգստացնելու, լարվածությունը թուլացնելու և ժամանակ շահելու միջոց են ընդամենը։

«Չմոռանանք, որ ադրբեջանական կողմը հայտարարել է, որ մինչև ամառվա վերջ , այսպես կոչված, սահմանազատման գործընթացը պետք է ավարտված լինի։ Անգերազանցելի մանիպուլյատոր, կեղծիքի վարպետ Նիկոլ Փաշինյանին երեք ամիս է պետք դրա համար»,-նշեց պատգամավորը։

Ուշադրություն հրավիրելով պաշտոնական լրահոսում բանակցային գործընթացի վերաբերյալ մասնավորապես ՔՊ-ի կողմից օգտագործվող հետևյալ խոսույթին՝ «Արցախի ժողովուրդը տեղյակ է պահվում բանակցային գործընթացի մասին», պատգամավորը նկատեց․

«Ի՞նչ է նշանակում «տեղյակ է պահվում»։ Եթե ՀՀ-ի և Արցախի իշխանությունների միջև գործընկերային հարաբերություններ են, ապա պետք է համատեղ քննարկվեն բանակցային գործընթացի վերաբերյալ բոլոր հարցերը և համատեղ էլ կայացվեն որոշումները։ Ցավոք, հայկական երկու պետությունների միջև հարաբերությունները գործընկերային են եղել մինչև 2018 թվականը։ Դրանից հետո մենք միայն տիրոջ ու ծառայի հարաբերություններ ենք տեսել»,-նշեց արցախցի պատգամավորը։

Անվտանգության խորհրդի նիստին արված հայտարարության մասին «Փաստինֆո»-ն փորձել է մեկնաբանություն ստանալ նաև Արցախի Աժ-ում ներկայացված մյուս քաղաքական ուժերից, ինչը, ցավոք, չի հաջողվել։

Աղբյուր` Փաստինֆո