Փաստ ինֆո

Բրյուսելյան փաստաթղթի մեջ ոչ մի հայկական մոտեցում չկա․ բոլոր հարցերը բացառապես ադրբեջանական և թուրքական են։ Այս մասին քիչ առաջ ԱԱԽ-ի դիմաց հայտարարեց Աժ նախկին պատգամավոր Արմեն Աշոտյանը։

«Այս ուսապարկերը ձեզ խաբում են՝ ասելով, թե շատ լավ է, որ ճամփան բացվում է․ Երասխից Նախիջանով կգնանք Սիսիան, Գորիս և այլն։ Հիմա բոլորդ հիշեք ձեր բնակարանները, ձեր հարևաններին և պատկերացրեք, որ ձեր հյուրասենյակից ննջասենյակ գնալու համար պետք է անցնեք հարևանի զուգարանով։ Դուք այդ ճանապարհը ձեր ընտանիքի համար հարմա՞ր ճանապարհ եք համարում»- Նախիջևանով ճանապարհի վտանգները պատկերացնելու համար նման օրինակ բերեց Աշոտյանը։

Անդրադառնալով դեռևս անցած տարի ԵՄ-ի՝ Հայաստանին 2,6 մլրդ եվրո նվիրաբերելու խոստումին, Աշոտյանը շեշտեց, որ դրանից 1 մլրդը պետք է հատկացվեր Սյունիքի ճանապարհներին։

«Հիմա Նախիջևանի կուտը որ մեզ տալիս են, բա էդ մեկ միլարդը ինչի՞ վրա են ծախսելու և կամ ինչո՞ւ չեն սարքում, եթե կարան․ ինչո՞ւ ենք մնում թուրքի ճանապարհի հույսին։ Դա ունի մեկ պատասխան՝ մեր երկիրը ղեկավարող մարդը բնավորությամբ, հոգով, ուղնուծուծով թուրք է։ Պատկերացրեք՝ Նախիջևանով ճանապարհը, Աստված մի արասցե, բացվեց․ ի՞նչ է լինելու Սյունիքի հետ։ Այդ ճանապարհի վրա, հարևանությամբ գտնվող գազալցակայանների, խանութների, սրճարաների հետ ի՞նչ է լինելու։ Մի ամբողջ մարզի ժողովուրդ այդ ճամփով է ապրում։ Ինչո՞վ ենք Հայաստան լինելու, եթե մեր ճամփեքով չենք գնալու-գալու, մեր հողն ու ջուրը չենք շնչելու, շոշափելու։ Այդպես տարիների ընթացքում Սյունիքը մոռացվելու է։ Ահա ևս մեկ փաստ, թե Բրյուսելի փաստաթղթում ինչքան հակահայկական սրիկայություն կա»,-ասաց Աշոտյանը։

ԱԺ նախկին պատգամավորը, սակայն, նշեց, որ այդտեղ ոչ ռուսին, ոչ էլ եվրոպացուն պետք չէ մեղադրել, քանի որ իրենք իրենց շահն են հետապնդում։ Այն, որ Նիկոլ Փաշինյանը ՀՀ վարչապետ է, Աշոտյանի խոսքով, բացառապես հայերիս մեղքն է և այս համազգային պայքարն էլ նրա համար է, որ այսուհետ ունենանք բացառապես ՀՀ-ի և Արցախի շահը պաշտպանող ղեկավար։

Աղբյուր` Փաստինֆո