Փաստ ինֆո

«Կոչ եմ անում ուժային կառույցներին, կոչս ուղղում եմ բոլոր պետական ծառայողներին՝ լավ մտածեք,- քիչ առաջ Ֆրանսիայի հրապարակի հարթակից հայտարարել է Ազգային Ժողովի «Հայաստան» դաշինքի պատգամավոր Իշխան Սաղաթելյանն ու ավելացրել,- տղերք, նայեք ձեր ծնողների ու զավակների աչքերի մեջ ու այս գիշեր քնելուց առաջ ձեզ հարց տվեք…Դավաճանը, միևնույն է, գնալու է, մեղքն ու պատասխանատվությունը ձեր վզին մի վերցրեք»։

Պատգամավորը նկատել է՝ մինչև պատերազմը վիճակն այլ էր և հավելում՝ բոլոր այն մարդիկ՝ մեր ժողովուրդը, քաղաքական ուժերը, բազմաթիվ հանրային դեմքեր, ովքեր մինչև պատերազմը հավատացել են Փաշինյանի, այդ մարդկանց ինքն ըմբռնմամբ է մոտենում, սակայն, պատերազմից հետո իրավիճակն այլ է. «Պատերազմից հետո Նիկոլին սատարելն անտրամաբանական է։ Իսկ այս օրերին, երբ ակնհայտ է, որ այս մարդը հերթական անգամ երկիրը տանում է նոր զիջումների, հատկապես, հիմա Նիկոլին սատարելը մեղք է։ Հետևաբար, մեկ անգամ ևս, կոչ եմ անում՝ մի մտեք այդ պատասխանատվության տակ, մի կիսեք մեղքի բաժինը։ Հանուն պաշտոնի կամ դիրքի, մի սատարեք Նիկոլին»,- ասում է Իշխան Սաղաթելյանը։

Ըստ վերջինիս համոզման, միակ հենարանը, որ սատարում է Նիկոլ Փաշինյանին այս պահին՝ մնացել են միայն ուժային կառույցները, որոնք, սակայն, չեն կարողանալու կասեցնել ժողովրդի այս ցասումը։

Աղբյուր` Փաստինֆո