Փաստ ինֆո

Իշխող «Քաղաքացիական պայմանագիր» խմբակցությունը ԱԺ այսօրվա նիստում քննարկեց լրագրողների իրավունքները սահմանափակող հերթական օրենքի նախագիծը:

ՔՊ-ականները քննարկեցին իրենց իսկ հեղինակած «Զանգվածային լրատվության մասին» օրենքում փոփոխությունների մասին օրինագիծը, որով սահմանվում է, որ լրագրողի հավատարմագրումը կարող է դադարեցվել ոչ միայն իր ներկայացրած ԶԼՄ-ի, այլև նրան հավատարմագրած պետական մարմնի պահանջով՝ աշխատանքային գոտում իրականացված խախտումների հիմքով:
Նախագիծը ԱԺ-ում ներկայացրեց խմբակցության քարտուղար Արուր Հովհաննիսյանը:

Նրա խոսքով՝ խնդրահարույց է ԶԼՄ մասին օրենքի այն դրույթը, երբ լրագրողի հավատարմագրումը հնարավոր է դադարեցնել միայն լրատվական գործունեություն իրականացնողի դիմումով: Լրատվական գործունեություն իրականացնողին թեպետ աշխատանքային գոտում իրականացված խախտումների վերաբերյալ տեղեկացվում է, սակայն դրան չի հետեւում լրատվական գործունեություն իրականացնողի որեւէ գործողություն: Դրա հետեւանքով հնարավոր չի լինում վերականգնել աշխատանքային գոտու բնականոն աշխատանքը, ինչպես նաեւ շատ դեպքերում նման իրավիճակը խոչընդոտում է այլ լրագրողների բնականոն գործունեության իրականացմանը: Արթուր Հովհաննիսյանն ընդգծել է, որ տեխնիկական փոփոխություն է կատարվել: Առաջարկվող կարգավորմամբ՝ լրագրողի հավատարմագրումը կարող է դադարեցվել նրան հավատարմագրման ներկայացրած լրատվական գործունեություն իրականացնողի դիմումով կամ նրան հավատարմագրած պետական մարմնի կողմից: Լրագրողին հավատարմագրած պետական մարմնի կողմից սեփական նախաձեռնությամբ հավատարմագրումը կարող է դադարեցվել միայն, եթե աշխատանքային կանոնների խախտման համար նախատեսված գրավոր նախազգուշացումից հետո մեկ տարվա ընթացքում լրագրողը կրկին խախտի այդ կանոնները:

Արթուր Հովհաննիսյանը հավաստիացրել է, որ լրատվամիջոցը չի զրկվում պետական մարմնում գործունեություն իրականացնելու իր իրավունքից, եւ որեւէ իրավունք չի ոտնահարվում: Փոփոխության նպատակն է պետական կառույցում աշխատանքային միջավայրի բնականոն ապահովումը, համակեցության կանոնների պահպանումը, լրագրողների բնականոն գործունեության իրականացումը:

ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի անդամ Հասմիկ Հակոբյանի տեղեկացմամբ՝ այս փոփոխությունն օրենսդրական բացը լրացնելու նպատակ ունի, քանի որ գործող օրենքը պետական մարմնին լրագրողի հավատարմագրումը դադարեցնելու հնարավորություն տալիս է, սակայն բացակայում է համապատասխան գործիքակազմը:

Պատգամավոր Գևորգ Պապոյանն էլ կարծիք հայտնեց, թե հանրության աչքում երբեմն լրագրությունը ասոցացվում է որոշ լրագրողների վարքագծի հետ: «Հետևաբար, այս նախագիծն այն հարյուրավոր իրապես բարձր պրոֆեսիոնալ լրագրողների համար է, որոնք պետք է չմտածեն, որ առանձին մարդիկ կարող են իրենց ոչ հարիր վարքագծով մի ամբողջ համայնքի անվան հետ խաղալ»,-ասաց նա:
Նշենք, որ նախագծի հեղինակներ են «Քաղաքացիական պայմանագիր» խմբակցության պատգամավորներ Արթուր Հովհաննիսյանը եւ Լիլիթ Մինասյանը

Աղբյուր` Փաստինֆո