Փաստ ինֆո

Տևական ժամանակ է՝ ՀՀ իշխանությունները հայտարարում են Ադրբեջանի հետ, այսպես կոչված, խաղաղության պայմանագրի կնքման նախապատրաստման և այդ համատեքստում սահմանագծման ու սահմանազատման գործընթացի անհրաժեշտության մասին։ Ադրբեջանում շտապում են սկսել հատկապես սահմանագծման ու սահմանազատման գործընթացը։ Երեկ հայտնի դարձավ, որ այդ նպատակով Ադրբեջանում ստեղծվել է պետական հանձնաժողով, որը գլխավորում է այդ երկրի փոխվարչապետ Շահին Մուստաֆաևը, ինչին զուգահեռ ստեղծվել է նաեւ փորձագիտական խումբ՝պետական հանձնաժողովին օգնելու համար։

Սահմանագծման ու սահմանազատման հարցերով զբաղվելու համար Հայաստանում ևս ստեղծվել է հանձնաժողով՝ փոխվարչապետ Մհեր Գրիգորյանի գլխավորությամբ։

Հատկանշական է, որ հայկական կողմի հանձնաժողովի կազմում ընդգրկված է 11 պաշտոնյա, մինչդեռ ադրբեջանական հանձնաժողովում ընդգրկված են ներկայացուցիչներ 22 գերատեսչություններից։

Ավելին՝ ՀՀ-ում ստեղծված համապատասխան հանձնաժողովի մեջ փորձագիտական շրջանակներից ներկայացուցիչներ չկան, չկա տեղեկություն նաեւ փորձագիտական խումբ ներգրավելու մասին։

Պարզելու համար ՀՀ ԳԱԱ Պատմության ինստիտուտից որևէ մեկը ներգրավված է հանձնաժողովի աշխատանքներում, թե ոչ, «Փաստինֆո»-ն կապ է հաստատել ինստիտուտի տնօրեն, ակադեմիկոս Աշոտ Մելքոնյանի հետ։

«Արտաքին գործերի նախարարությունում՝ Արսեն Ավագյանի գլխավորությամբ, մի հանձնախումբ է աշխատել․ մեզ դիմել էին և մեր ունեցած քարտեզներն ու նկարագրությունները տրամադրել ենք այդ հանձնաժողովին։ Երկու-երեք նիստից հետո մեր մասնակցությամբ նիստ այլևս չի գումարվել։ Չեմ կարող ասել՝ առանց մեզ եղել է նիստ, թե՝ ոչ»,- «Փաստինֆո»-ի հետ զրույցում նշեց Մելքոնյանը։

Ակադեմիկոսը հայտնեց, որ մեկ անգամ էլ փոխվարչապետ Մհեր Գրիգորյանին է հանդիպել, ում փոխանցել է Խորհրդային միության գլխավոր շտաբի քարտեզները։

«Դրանք, բնականաբար, պատճեններ են եղել, բայց կնիքված։ Բոլոր այդ քարտեզները, որոնք վերաբերում են 40-ական, 50-60-ական թվականերին, շատ կարևոր քարտեզներ են և պետք է անպայմանորեն օգտագործվեն։ Դրանցից առաջ տրամադրվածները ևս տարբեր ժամանակահատվածների են վերաբերում՝ այդ թվում 1926 թվականին»,-ասաց Մելքոնյանը։

ԳԱԱ Պատմության ինստիտուտի գիտաշխատողներ Կարեն խաչատրյանի, Համլետ Սուքիասյանի և Գեղամ Բադալյանի գլխավորությամբ ստեղծված աշխատանքային խումբը ևս իր ձեռք տակ եղած քարտեզներն ու նյութերը՝ առանձնապես Անդրդաշնության Կենտգործկոմի որոշումները, պատճենահանված տարբերակներով ներկայացրել է վերոհիշյալ հանձնաժողովին։

Ակադեմիկոս Մելքոնյանը վերահաստատում է՝ վերջին անգամ այդ աշխատանքներին մասնակցել է առնվազն 7-8 ամիս առաջ։

Աղբյուր` Փաստինֆո