Փաստ ինֆո

Երևանում իրականացվող խաղաղ ակցիաների ընթացքում ԱԺ պատգամավոր Արծվիկ Մինասյանի նկատմամբ ոստիկանների կողմից բռնություն գործադրելու դեպքի առթիվ քրեական գործ դեռևս հարուցված չէ, թեև դեպքից անցել է արդեն հինգ օր։ Հակակոռուպցիոն կոմիտեն ձգձգում է քրեական գործի հարուցումը՝ չնայած առկա ակնհայտ ապացույցներին՝ տեսագրությանը, որտեղ երևում է, թե ինչպես են ոստիկանները բռնություն գործադրում ԱԺ պատգամավորի նկատմամբ։

Հիշեցնենք, որ դեպքը տեղի է ունեցել Ֆրանսիայի հրապարակին հարող տարածքում՝ մայիսի 18-ին։

Տեսախցիկները ֆիքսել են, թե ինչպես են բերետավորները՝ մոտ 10 հոգի, հարձակվում Ա. Մինասյանի վրա ու քաշքշելով, հրմշտելով նստեցնում ոստիկանական մեքենան, այնուհետեւ մոտենում է կոչումով ավելի բարձրը ու նրան հանում մեքենայից։ Քիչ անց ոստիկանների մեկ այլ խումբ կրկին փորձել է նրան բռնության գործադրմամբ նստեցնել ոստիկանական մեկ այլ միկրոավտոբուս ու կրկին կոչումով ավագը նրան ազատ է արձակել։ Դեպքի առնչությամբ ոստիկանությունում ծառայողական քննություն է նշանակվել, իսկ փաստաբան Վահե Գրիգորյանը հաղորդում է ներկայացրել ՀՀ գլխավոր դատախազություն՝ պահանջելով հարուցել քրեական գործ ։

ՀՀ գլխավոր դատախազությունից նույն օրը «Փաստինֆո»-ին հայտնել են, որ հաղորդումն ուղարկվել է Հակակոռուպցիոն կոմիտե, որտեղ, սակայն առ այս պահը քրեական գործ չի հարուցվել։Արծվիկ Մինասյանը բացատրություն է տվել Հակակոռուպցիոն կոմիտեում. նշանակվել է դատաբժշկական փորձաքննություն։

Արծվիկ Մինասյանը «Փաստինֆո»-ի հետ զրույցում հայտնեց, որ նյութերի նախապատրաստման շրջանակներում բացատրություն է տվել, մանրամասն ներկայացրել եղելությունը՝ մատնանշելով նաև կոնկրետ ոստիկանների։ Նյութերի նախապատրաստման շրջանակներում նշանակվել է դատաբժշկական փորձաքննություն, իսկ թե արդյո՞ք արդեն բացատրություն տվել են ոստիկանները՝ Մինասյանը տեղեկություն չունի։

Ի դեպ, քրեական դատավարության օրենսգիրքը նյութերի նախապատրաստման համար 10-օրյա ժամկետ է սահմանում, հետևաբար, առաջիկա օրերին Հակակոռուպցիոն կոմիտեն արդեն պետք է որոշում կայացնի՝ քրեական գործ հարուցելու կամ մերժելու մասին, իսկ նկատի ունենալով, որ բռնությունը տեղի է ունեցել հրապարակային՝ տեսախցիկների առջև, գործը «ծածկադմփոց» անել չի հաջողվի, միայն պարզ չէ՝ ինչու քրեական գործն ավելի վաղ չի հարուցվել՝ հաշվի առնելով, որ առկա է օբյեկտիվ ապացույց՝ տեսագրություն։
Հեղինակ՝ Իզաբել Սահակյան

Աղբյուր` Փաստինֆո