Փաստ ինֆո

Բրյուսելյան երեկվա հանդիպումը Արցախի ճակատագրի վրա խաչ քաշելու հերթական հանդիպումն էր, Հայաստանի կապիտուլյանտներն Արցախն ամբողջությամբ ընկալում են որպես Ադրբեջան: «Փաստինֆո»-ի հետ զրույցում նման հայտարարությամբ է հանդես եկել ՀՀԿ ԳՄ անդամ, ՊՆ նախկին փոխնախարար Արտակ Զաքարյանը՝անդրադառնալով երեկ Բրյուսելում կայացած Փաշինյան-Ալիև- Շառլ Միշել եռակողմ հանդիպմանը:

Նկատենք, որ եռակողմ շուրջ 5 ժամ տեւած բանակցություններից հետո Շառլ Միշելը հայտարարել է, որ առաջիկա օրերին միջպետական սահմանին տեղի կունենա սահմանային հանձնաժողովների առաջին համատեղ նիստը, որը կանդրադառնա բոլոր այն հարցերին, որոնք վերաբերվում են սահմանազատմանը և կայուն իրավիճակի լավագույնս ապահովմանը։ Ավելին, նշել է, որ Հայաստանի ու Ադրբեջանի ղեկավարները համակարծիք էին, որ անհրաժեշտ է առաջ գնալ տրանսպորտային կապերի ապաշրջափակման հարցում եւ համաձայնության եկել՝ տարանցման կարգավորման սկզբունքների վերաբերյալ՝ արեւմտյան Ադրբեջանի եւ Նախիջեւանի, Ադրբեջանի տարածքով՝ Հայաստանի տարբեր մասերի, ինչպես նաեւ երկու երկրների հաղորդակցության ենթակառուցվածքների միջոցով միջազգային բեռնափոխադրումների շուրջ: Պայմանավորվել են նաեւ առաջ տանել Հայաստանի եւ Ադրբեջանի միջեւ ապագա խաղաղության պայմանագրի շուրջ քննարկումները, որով կարգավորվելու են միջպետական հարաբերությունները։ Ուշագրավ է Արցախի հիմնախնդրի վերաբերյալ ԵՄ պաշտոնյայի ձեւակերպումը. «անհրաժեշտ է ապահովել Ղարաբաղի էթնիկ հայ բնակչության իրավունքներն ու անվտանգությունը»։

Արտակ Զաքարյանը նկատում է, որ հանդիպման արդյունքների վերաբերյալ ԵՄ նախագահ Շառլ Միշելի հայտարարության մեջ որևէ խոսքը չկա Արցախի ինքնորոշման մասին։ Ըստ Զաքարյանի՝ սա նշանակում է, որ Արցախի քաղաքացիները դիտարկվում են որպես Ադրբեջանի քաղաքացիներ, որպես ազգային փոքրամասնություն և միայն նրանց իրավունքներն են քննարկվում.

«Բավարարվում ենք միայն անվտանգային երաշխիքներով, որոնք գոյություն չունեն, դա ո՛չ Հայաստանի, ո՛չ Ադրբեջանի ո՛չ էլ Արևմուտքի հետ կապ չունի, դա Ռուսաստանի ձեռքբերումն է»,-ասաց Զաքարյանը:

Համատեղ հայտարարության մեջ նշվում է, որ կողմերը համաձայնության են եկել տարանցման կարգավորման սկզբունքների վերաբերյալ՝ Արևմտյան Ադրբեջանի եւ Նախիջևանի, Ադրբեջանի տարածքով՝ Հայաստանի տարբեր մասերի, ինչպես նաեւ երկու երկրների հաղորդակցության ենթակառուցվածքների միջոցով միջազգային բեռնափոխադրումների շուրջ:

Զրուցակիցը կարծում է, որ Ադրբեջանի և Նախիջևանի միջև ՀՀ տարածքով բացվող կոմունիկացիաներն իրականում հայկական կողմի վերահսկողության տակ չեն լինելու.

«Ամեն դեպքում հայտարարության մեջ դա չի երևում»,-հավելեց Զաքարյանը:

Հանդիպման ընթացքում պայմանավորվածություն է ձեռք բերվել նաև առաջիկա օրերին սահմանային հանձնաժողովների առաջին համատեղ նիստ անցկացնելու մասին:

Թե ինչո՞ւ մինչ սահմանազատման աշխատանքները՝ Հայաստանը նախ չի պահանջում, որպեսզի ՀՀ ինքնիշխան տարածք ապօրինի ներխուժած ադրբեջանական զորքերը դուրս բերվեն, Արտակ Զաքարյանն ասաց.

«Հայաստանի իշխանությունները կապիտալացված են, նրանք կապիտուլյացիան ակտ են ստորագրել և իրավունք չունեն ոչինչ պահանջելու, այդ պահանջին ոչ մեկը»:

ՊՆ նախկին փոխնախարարի տպավորությամբ՝ Արևմուտքը փորձում է Արցախի հարցում առաջնահերթությունը վերցնել իր ձեռքը, որպեսզի ամբողջությամբ իր ձեռքը վերցնի նաև Ադրբեջանի նավթագազային միջոցները, Թուրքիային հնարավորություն տա Հարավային Կովկասի միջոցով ավելի լայն աշխարհաքաղաքական խնդիրներ լուծել՝Հայաստանի հաշվին, և Ռուսաստանին կտրի Հարավային Կովկասից:

Իսկ այս դեպքում արդյո՞ք ԵՄ-ն որոշ ժամանակ անց նաև ռուս խաղաղապահներին Արցախից դուրս բերելու պահանջ չի ներկայացնի, Արտակ Զաքարյանն ասաց.

«Այսօր չէ, վաղը կներկայացնի՝ Ադրբեջանի միջոցով , իսկ այս դեպքում արցախցիները անվտանգության երաշխիքներ էլ չեն ունենա, Նիկոլն արցախյան ամբողջ պատմությունը, հայ ժողովրդի հաղթանակները դավադրաբար ջուրն է լցնում»:

Աղբյուր` Փաստինֆո