Փաստ ինֆո

Վերաքննիչ քրեական դատարանի նախագահ Տիգրան Սահակյանը ՀՀ նախկին գլխավոր դատախազ, ՔԿ նախագահ Աղվան Հովսեփյանի գործով ներկայացրած վերաքննիչ բողոքը դատավոր Արշակ Վարդանյանի վարույթից վերցրել և ձեռքով մակագրմամբ փոխանցել է դատավոր Ռուբիկ Մխիթարյանին։

Ինչպես արդեն տեղեկացրել ենք՝ Աղվան Հովսեփյանի և Վրեժ Մարկոսյանի գործով դատաքննության՝ նախապատրաստման փուլում պաշտպանության կողմը միջնորդել էր գրավ կիրառել Հովսեփյանի նկատմամբ, ինչը Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, մերժել էր՝ անփոփոխ թողնելով Աղվան Հովսեփյանի կալանավորումը։

Պաշտպանները վերաքննիչ բողոք են ներկայացրել՝ պահանջելով բեկանել առաջին ատյանի դատարանի որոշումը և Աղվան Հովսեփյանի նկատմամբ որպես խափանման միջոց կիրառել գրավը։ Պաշտպանների ներկայացրած վերաքննիչ բողոքն՝ օրենքով սահմանված կարգով՝ էլեկտրոնային եղանակով մակագրվել է Վերաքննիչ քրեական դատարանի դատավոր Արշակ Վարդանյանին, մակագրությունը, սակայն, այս իշխանությունների և վերջիններիս կամակատար Գագիկ Ջհանգիրյանի սրտով համարվել չէր կարող, քանի որ դատավոր Վարդանյանն ունի անկախ դատավորի համբավ և վերջինիս նկատմամբ որևէ ազդեցություն բացառված է, հետևաբար փոխել են դատավորին։ «Փաստինֆո»-ին հայտնի դարձավ, որ որպես վերամակագրման հիմք մատնանշվել է մակագրման էլեկտրոնային համակարգի «սխալը». վիճարկվող ակտը թեև արդեն դատարանի վարույթում գտնվող գործով է, սակայն կայացվել է դեռևս դատաքննության նախապատրաստման փուլում, հետևաբար, այն պետք է քննվի մինչդատական վարույթի դատարանի կողմից, ըստ այդմ՝ որոշել են վերամակագրել։ Այսինքն՝ այնքան են արդեն մերվել իրենց զեղծարարությունների հետ, որ այլեւս չեն էլ փորձում գոնե ձեւականորեն օրենքը պահպանել և որևէ «անկանխատեսելի» ելք բացառելու համար դատարանի նախագահն ակնհայտորեն, մեղմ ասած, շրջանցել և խախտել է օրենքը, այն է՝ էլեկտրոնային մակագրման համակարգի գործարկման պայմաններում ձեռագիր մակագրմամբ գործը հանձնել է իշխանությունների սրտի դատավորներից մեկին՝ Ռուբիկ Մխիթարյանին։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո