Փաստ ինֆո

Զոհված զինծառայողների հարազատները պահանջում են, որ Վերաքննիչ քրեական դատարանի դատավոր Կարեն Բիշարյանը չքննի Նիկոլ Փաշինյանի կողմից առերևույթ պետական դավաճանության հատկանիշներով քրեական գործ հարուցելու պահանջով բողոքը։ 

Ինչպես արդեն տեղեկացրել ենք՝ բողոքի քննության շրջանակներում փաստաբան Հակոբ Մարտիրոսյանը և ԱԺ «Հայաստան» խմբակցության քարտուղար Արծվիկ Մինասյանը դատավոր Կարեն Բիշարյանին ինքնաբացարկի միջնորդություն են ներկայացրել։ Մինչ խորհրդակցական սենյակ հեռանալը դատավորը 10 րոպե ընդմիջում էր հայտարարել, որի ընթացքում զոհված և անհետ կորած զինծառայողների հարազատ Արսեն Ղուկասյանը ծնողների անունից հայտարարությամբ հանդես եկավ՝ հորդորելով դատավորին ինքնաբացարկ հայտնել։

Դատարանն ավարտված համարեց միջնորդության քննությունը և լսելով կողմերին՝ հեռացավ խորհրդակցական սենյակ՝ որոշում կայացնելու, որը պետք է հրապարակվի այսօր՝ ժամը 17.00-ն։ Դատավորն արդեն դուրս էր եկել նիստերի դահլիճից, երբ նրան դիմեց Արցախի հերոս Դավիթ Առուշանյանի մայրը՝ տիկին Լիդան՝ նշելով, որ խոսք ունի դատավորին ասելու։ Թեև կարգադրիչները փորձեցին թույլ չտալ կնոջը մոտենալ, սակայն դատավորը վերադարձավ՝ նշելով, որ կլսի նրան։

Լիդա Առուշանյանը բավականին էմոցիոնալ խոսեց՝ ընդգծելով, որ 2018 թվականին ՀՀ-ն գրավեց հրեշը, նստեց գահին ու մեզ տարավ պատերազմի, բանակը կազմալուծեց, մեր բոլոր հերոսներին աշխատանքից հանեց։ Նա նշեց, որ, երբ իր որդուն նահանջի հրաման են տվել, որդին ասել է՝ «նահանջի տեղ չկա, հետևում Արցախն է»։

«Հիմա այդ Արցախը չկա, ինչու չկա։ Մեր բանակը կռվել է, հաղթել է, սա կանխամտածված պարտություն է՝ Նիկոլի հրամանով, որին Դուք էլ եք ենթարկվում, վախենում եք՝ դհոլչուց բռնած՝ դամքաշով դուրս եկած, հանձինս՝ Ձեզ։ Դուք չդատեք, ԵԴ-ն չդատի, ու՞ր եք փախչելու՝ երկնային դատավորից»,- նշեց Լիդա Առուշանյանը, ինչին ի պատասխան դատավորն ասեց՝ ոչ մի տեղ չի փախչելու։

«Փախչելու եք։ Թուրքը գալու է ձեր կնոջը բռնաբարի՝ ձեր աչքերի առաջ, ինչպես՝ Սումգայիթում, Կիրովաբադում։ Ձեզնից լավ տղերք էին, որ նրանց բռնաբարեցին, ձեզ տուզիկի տեղ էլ չեն դնելու։ Ինչու չեք դատում»,- հայտարարեց Լիդա Առուշանյանը։

Թեև կնոջ խոսքերի հասցեատերն, ըստ էության, այդքան էլ դատավորը չէր, սակայն վերջինս համբերատար լսեց տարեց կնոջ խոսքը ։
«Մայրիկ ջան, ես՝ որպես ՀՀ քաղաքացի, Կարեն Բիշարյան, խոնարհվում եմ մեր նահատակների շիրիմների առաջ, խորապես ցավում եմ այն իրադարձությունների համար, որը եղել է, որպես դատավոր՝ պարտավոր եմ իրականացնել արդարադատություն, առաջնորդվել՝ օրենքով»,- ասաց դատավոր Կարեն Բիշարյանը։

Դատավորի խոսքերը, սակայն, ծնողները չէին լսում, նրանք միացել էին Լիդա Առուշանյանի հայտարարություններին, ինչի հետևանքով դատավորը տևական ժամանակ չէր կարողանում հեռանալ խորհրդակցական սենյակ:

Նշենք, որ խոսքը նախկին դատախազ Հակոբ Մարտիրոսյանի և Արծվիկ Մինասյանի՝ դեռևս 2021թ. հունիս ամսին ներկայացված հանցագործության մասին հաղորդման մասին է։ Մասնավորապես, նրանք հաղորդում էին ներկայացրել՝ պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։ Ներկայացված հանցագործության մասին հաղորդմամբ Հակոբ Մարտիրոսյանը ներկայացրել է փաստական հանգամանքներ, որոնք առերևույթ վկայում են Նիկոլ Փաշինյանի կողմից թշնամի պետությանն օգուտ տալու մասին՝ ի վնաս ՀՀ-ի։ Ներկայացված հանցագործության մասին հաղորդումն առանձին քննության առարկա չի դարձվել, մասնավորապես, դատախազությունը հաղորդումը «մասնատել» է և մի մասով ուղարկել է ԱԱԾ քննչական դեպարտամենտ՝ Շուշիի անկման և Արցախի հարավային ուղղությամբ կատարված իրադարձությունների վերաբերյալ քրեական գործի, իսկ մի մասով՝ ՀՔԾ-ում քննվող՝ Մովսես Հակոբյանի կողմից ասուլիսում արված հայտարարությունների առթիվ հարուցված քրեական գործի շրջանակներում։ Դատախազության կողմից հաղորդմանը պատշաճ կարգով ընթացք չտալու հանգամանքը դիտարկվել է որպես անգործություն և դատախազության անգործության դեմ փաստաբանը բողոք է ներկայացրել դատարան։ Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մերժել էր բողոքը։ Դատարանի այս որոշման դեմ վերաքննիչ բողոք է ներկայացվել, որը մակագրվել է Վերաքննիչ քրեական դատարանի դատավոր Կարեն Բիշարյանին։

Հեղինակ՝ Իզաբել Սահակյան

Աղբյուր` Փաստինֆո