Փաստ ինֆո

Ուղիղ երեք տարի առաջ գործող իշխանությունները բացահայտ դիմեցին դատարանների նկատմամբ աննախադեպ ճնշման։ Գործադիրի ղեկավարի՝ Նիկոլ Փաշինյանի ուղիղ հրահանգով գործադիր ու օրենսդիր իշխանությունների ներկայացուցիչները շրջափակեցին դատարանների շենքերը՝ բողոքելով, որ Երեւանի ընդհանուր իրավասության դատարանը՝ դատավոր Դավիթ Գրիգորյանի նախագահությամբ, «հանդգնել» էր քաղաքական իշխանության քիմքին ոչ հարիր որոշում կայացնել Ռոբերտ Քոչարյանի գործով, այն է՝ փոխել երկրորդ նախագահի խափանման միջոցը։

2019թ մայիսի 20-ին անկախ Հայաստանի պատմության մեջ առաջին անգամ գործադիր իշխանության ղեկավարի ակտիվ մասնակցությամբ պարալիզացվեց դատարանների աշխատանքը՝ թույլ չտալով դատավորներին մուտք գործել դատարանի շենք ու իրականացնել իրենց սահմանադրական գործառույթը։

Դեպքի օրը՝ 2019թ մայիսի 20-ին Երևանի ընդհանուր իրավասության դատարանի դատավոր Դավիթ Բալայանը փորձել էր մուտք գործել դատարանի շենք, սակայն Նիկոլ Փաշինյանի հորդորով դատարանի դիմաց հավաքված անձինք թույլ չեն տվել, քաշքշել են՝ արդյունքում դատավորը վայր է ընկել։ Փաստաբան Հրանտ Անանյանը կատարվածի վերաբերյալ հանցագործության մասին հաղորդում էր ներկայացրել, սակայն ՀՔԾ-ն տվյալ օրվա վերաբերյալ բոլոր ահազանգերը միացրել է մեկ վարույթում ու մերժել քրեական գործի հարուցումը՝ հանցադեպի բացակայության հիմքով։ Այս որոշումը փաստաբան Անանյանը բողոքարկել էր դատախազություն, սակայն դատախազությունը ևս մերժել էր բողոքը, ինչից հետո փաստաբանը դիմել է դատարան։

Արդյունքում, Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, դեռևս մեկ տարի առաջ բավարարել է փաստաբանի բողոքը՝ վերացնելով քրեական գործի հարուցումը մերժելու մասին նախաքննական մարմնի որոշումը, սակայն քրեական գործն առ այս պահը հարուցված չէ։ Փաստաբան Հրանտ Անանյանը «Փաստինֆո»-ի հետ զրույցում հայտնեց, որ դատական ակտը ստացել է և առ այս պահը տեղեկություն չունի՝ քրեական գործ հարուցելու, ինչպես նաև՝ դատախազության կողմից վերաքննիչ բողոք ներկայացնելու վերաբերյալ։ Չի ստացվել ո՛չ բողոք, ոչ էլ՝ քրեական գործի հարուցման որոշման պատճեն, հետևաբար, չի բացառվում, որ դատական ակտը մնացել է անկատար։

Հեղինակ՝ Իզաբել Սահակյան

Աղբյուր` Փաստինֆո