Փաստ ինֆո

Իրավապահ համակարգի անգործությունն օգտագործելով «Դոգ» մականունով հայտնի Վարդան Ղուկասյանը շարունակում է թիրախավորելով անկախ դատավորների համբավ ունեցող դատավորներին։ Շուրջ մեկ տարի է, ինչ ՔԿ-ում արդեն քննվում է քրեական գործ՝ Վարդան Ղուկասյանի կողմից Վերաքննիչ քրեական դատարանի դատավոր Արշակ Վարդանյանին զրպարտելու և արդարադատության իրականացմանը խոչընդոտելու հատկանիշներով։ Քննությամբ պարզվել է, որ Ղուկասյանը տեղեկանալով, որ Մանախ մականունով հայտնի Արթուր Այվազյանին կալանավորելու որոշման դեմ բողոքը մակագրվել է Վերաքննիչ քրեական դատարանի դատավոր Արշակ Վարդանյանին, պատսպարված լինելով արտերկրում և կարծելով, որ կարող է անպատիժ մնալ, դատավորների և նրա ընտանիքի անդամների հասցեին հնչեցրել է սպառնալիքներ, հայհոյանքների ներքո պահանջել է կայացնել դատական ակտ, որի արդյունքում կալանքի տակ գտնվող Այվազյանը կհայտնվի ազատության մեջ։ Այլ խոսքով՝ Վարդան Ղուկասյանը հրապարակավ սպառնալիքներ և հայհոյանքներ հնչեցնելով ուղղակիորեն միջամտել է տվյալ գործի քննությանը՝ փորձելով դրդել՝ կայացնելու իր ակնկալած որոշումը: Բացի այդ` զրպարտել է դատավորին` նրան մեղադրելով իր գործով, իբր, ապօրինի դատական ակտ կայացնելու մեջ: Քրեական գործի շրջանակներում դատավոր Արշակ Վարդանյանը հարցաքննվել և տուժող է ճանաչվել։

Սակայն Վարդան Ղուկասյանը շարունակում է մնալ ազատության մեջ։ Իրավապահ մարմինների անգործությունը հանգեցրել է Ղուկասյանի կողմից նոր՝ նույնասեռ առերևույթ հանցագործությունների կատարման, որոնց առնչությամբ ևս հարուցվել են քրեական գործեր, որոնք այժմ քննվում են մեկ վարույթում, սակայն Ղուկասյանին հայտնաբերելու ուղղությամբ պատշաճ ջանասիրություն չի ցուցաբերվում։ Փաստացի, արդարադատության դեմ ուղղված հանցագործություններով պատշաճ քննություն չի իրականացվում, հատկապես, եթե հանցագործության մասին դիմողի դերում հանդես են գալիս այն դատավորները, որոնք դատական համակարգում հայտնի են իրենց անաչառությամբ, անկախությամբ ու «հանդգնում են» չենթարկվել գործադիրի հրահանգներին։ Համեմատության համար կարող ենք նշել, որ, օրինակ, Երևանի ընդհանուր իրավասության դատարանի դատավոր Աննա Դանիբեկյանի քթի պլաստիկ վիրահատության, ինչպես նաև՝ Դանիբեկյանին «վնգստացող դատավորների» վերաբերյալ հայտնի հայտարարության մասին հարց ուղղելու վերաբերյալ քրեական գործերը կարճ ժամանակում դատարան են ուղարկվել և այժմ դատաքննության փուլում են։

Վերաքննիչ քրեական դատարանի դատավոր Արշակ Վարդանյանը «Փաստինֆո»-ի հարցին ի պատասխան հայտնեց, որ մեկ քրեական գործ հարուցվել է դատավորին վիրավորելու հատկանիշներով, եւս մեկը՝ իրեն որպես ֆիզիկական անձի վիրավորելու համար՝ ՀՀ ՔՕ 137.1-րդ հոդվածով՝ ծանր վիրավորանքի հատկանիշներով։ Այժմ ՔԿ-ում մեկ վարույթում քննվում է երեք քրեական գործ, Վարդան Ղուկասյանը որպես մեղադրյալ ներգրավված է՝ դատավորին զրպարտելու և արդարադատությանը խոչընդոտելու հատկանիշներով, վերջինիս նկատմամբ հետախուզում է հայտարարված, սակայն դատախազը վերացրել է դատարանի որոշմամբ Ղուկասյանի նկատմամբ որպես խափանման միջոց ընտրված կալանավորումը՝ իբր ողջամիտ կասկածի բացակայության հիմքով։

«Նույնիսկ նախաքննության ավարտ էին ինձ հայտարարվել, ենթադրվում էր, որ այդ մեղադրանքով հետապնդումը պետք է դադարեցվեր, բայց դեռ չի դադարեցվել։ Իրենք իրենց փաստի առաջ են կանգնեցրել, բայց լուծում չեն կարողանում գտնել»,- նշեց դատավորը։

Բացի այդ, դատավորը պահանջում է քրեական գործ հարուցել նաև՝ դատավորին զրպարտելու հատկանիշներով։ Մասնավորապես, վերաքննիչ բողոք է ներկայացվել, որով վիճարկվել է քրեական հետապնդման մարմինների անգործությունը՝ դատավորին զրպարտելու դրվագով քրեական գործ չհարուցելու հանգամանքը, քանի որ տեսանյութերում բովանդակում են փաստական տվյալներ ոչ միայն դատավորին վիրավորելու, այլև՝ դատավորին զրպարտելու վերաբերյալ։ Խոսքը նյութական շահագրգռմամբ իբրև Վարդան Ղուկասյանի գործով մեղադրական դատական ակտ կայացնելու մասին է։ Դատավորը հայտնեց, որ առաջին ատյանի դատարանը բողոքը մերժել էր՝ ոչ մի փաստարկի չանդրադառնալով։ Առաջին ատյանի դատարանի որոշման դեմ դատավորը բողոք է ներկայացրել, որն այժմ դատավոր Տիգրան Սիմոնյանի վարույթում է։

Նշենք, որ «Դոգ» մականունով հայտնի Վարդան Ղուկասյանը 2015թ հուլիսի 23-ին դատապարտվել էր 4 տարվա ազատազրկման՝ շորթման եղանակով ուրիշի գույքի հափշտակման համար։ Մասնավորապես, ըստ քրեական գործի նյութերի, Ղուկասյանը մարմնավաճառությամբ զբաղվող կնոջից գումար շորթելու դիտավորությամբ հանձնարարել է իր մտերիմներից մեկին՝ տեսանյութեր նկարահանել հյուրանոցային համալիրներից մեկի մոտ պարբերաբար մարմնավաճառությանը զբաղվող կանանց վերաբերյալ։ Կնոջ մասնակցությամբ տեսանյութի նկարահանումից հետո կնոջից պահանջել են խոշոր չափերով գումար՝ սպառնալով, որ հակառակ դեպքում տեսանյութերը կտարածեն համացանցում։ Ընդ որում, դատաքննությունն իրականացվել է արագացված ընթացակարգով, հետևաբար, Վարդան Ղուկասյանն ինքն է դատարանում ընդունել իրեն մեղսագրվող մեղադրանքները։ Դատարանի կողմից կայացված վճիռը չի բեկանվել և մտել է օրինական ուժի մեջ։

Հեղինակ՝ Իզաբել Սահակյան

Աղբյուր` Փաստինֆո