Փաստ ինֆո

Օրինական ուժի մեջ մտած դատական ակտով արձանագրվել է, որ ԱԱԾ-ի կողմից Երևանի ընդհանուր իրավասության դատարանի դատավոր Դավիթ Հարությունյանի նկատմամբ իրականացված օպերատիվ հետախուզական միջոցառումներով՝ գաղտնալսումներով, անօրինական միջամտություն է կատարվել դատավորի՝ սահմանադրությամբ պաշտպանվող իրավունքներին, ձեռք բերված ապացույցները ճանաչվել են անթույլատրելի, բայց ԱԱԾ-ն չի ոչնչացրել։

Հիշեցնենք, որ քրեական գործը, որի շրջանակներում դատավորները գաղտնալսվել են, հարուցվել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի 2019թ մայիսի 18-ի որոշումից հետո:

Ֆեյսբուքյան օգտատեր Արտակ Գալստյանը, որը հայտնի է որպես «Վանոյի Արտակ», գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից: Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը: ԱԱԾ քննչական դեպարտամենտում շուրջ 2.5 տարի քննվող քրեական գործով դատավորներ Մխիթար Պապոյանը, Արշակ Վարդանյանը և Դավիթ Հարությունյանը տուժող են ճանաչվել, Վազգեն Ռշտունին ու Արման Հովհաննիսյանը՝ հարցաքննվել։

Ընդ որում, թեև քրեական գործը հարուցված է դատավորներին զրպարտելու մասին հաղորդման հիման վրա, օպերատիվ միջոցառումներ իրականացվել են դատավորների նկատմամբ։ Գաղտնալսվել են Երևանի ընդհանուր իրավասության դատարանի դատավորներ Դավիթ Հարությունյանը, Արման Հովհաննիսյանը, Վերաքննիչ քրեական դատարանի դատավորներ Մխիթար Պապոյանը, Արշակ Վարդանյանը, այն ժամանակ դատարանի նախագահի պաշտոնը զբաղեցնող Վազգեն Ռշտունին, ինչպես նաև Սահմանադրական դատարանի դատավոր Հրայր Թովմասյանը: Դատավոր Հարությունյանն ու Արշակ Վարդանյանը վիճարկել են իրենց նկատմամբ ՕՀՄ-ներ իրականացնելու թույլտվությունները, ինչի արդյունքում արձանագրվել է դատավորների իրավունքների խախտումը, իսկ ՕՀՄ իրականացնելու արդյունքում ձեռք բերված տվյալները ճանաչվել են որպես անթույլատրելի ապացույց, և վարույթն իրականացնող մարմնի հավաստմամբ` հանվել գործից:

Պարզվում է, սակայն, օրինական ուժի մեջ մտած դատական ակտի պայմաններում, ԱԱԾ-ն հրաժարվել է վերացնել ձայնագրությունները, հեռախոսային խոսակցությունների վերծանումները, ինչն էլ դատավոր Դավիթ Հարությունյանը վիճարկել է դատարանում՝ պնդելով, որ իր վերաբերյալ տեղեկությունները չեն կարող հասանելի դառնալ երրորդ անձանց։ Բողոքը Երևանի ընդհանուր իրավասության դատարանում քննել է դատավոր Վաչե Մարգարյանը, ընդ որում, դռնփակ ռեժիմով, թեև նման գործերը դռնփակ, սովորաբար, չեն քննվում։

Դատավոր Դավիթ Հարությունյանի ներկայացուցիչ, փաստաբան Միքայել Շխիմյանը «Փաստինֆո»-ի հետ զրույցում հայտնեց, որ դատարանը մերժել է բողոքը, ընդ որում, դատարանի որոշման մասին բողոքաբեր կողմն իմացել է դժվարությամբ, քանի որ տևական ժամանակ դատարանի աշխատակազմի հետ կապ հաստատել չի հաջողվել։ Դատարանի որոշման մասին իմացել են միայն երեկ, թեեւ որոշումը կայացվել է ավելի վաղ։

Փաստաբանը նշեց, որ դատական ակտի իրավական վերլուծություններին դեռևս ծանոթ չէ, սակայն փաստեց՝ օրինական որևէ հիմք պատկերացնել հնարավոր չէ՝ բողոքը մերժելու համար։

«Բողոքը մերժելու որևէ լեգիտիմ հիմք չկա»,- ընդգծեց փաստաբան Շխիմյանը՝ նշելով, որ միանշանակ դատական ակտը կբողոքարկվի։

Բացի այդ, փաստաբանն արձանագրեց, որ բողոքը դռնփակ ռեժիմով են քննվել՝ անհասկանալի պատճառներով, քանի որ նշված գործերը մշտապես քննվել են դռնբաց, դռնփակ կարող է լինել միայն բացառիկ դեպքերում, սակայն այստեղ որևէ բացառիկության մասին խոսք լինել չի կարող։

Դատավորի փաստաբանի փոխանցմամբ՝ դատախազի կողմից չբողոքարկված և օրինական ուժի մեջ մտած վճռով հաստատված է համարվել, որ ձայնագրությունները, վերծանումներն անթույլատրելի են, որևէ պարագայում չեն կարող գործում առկա լինել, սակայն առանց որևէ պատճառաբանության, քմահաճույքներից ելնելով՝ ԱԱԾ-ն որոշել է, որ դրանք չպետք է վերացնի և պետք է շարունակի հասու մնալ իքս շրջանակի և, ստացվում է, որ դատարանը համամիտ է անձնական տվյալների պաշտպանության սահմանադրական իրավունքի խախտման հետ։

Հեղինակ՝ Իզաբել Սահակյան

Աղբյուր` Փաստինֆո