Փաստ ինֆո

Այս անգամ, Թուրքիան ճիշտ է ասում՝ իսկապես, մենք նեղում ենք այս իշխանություններին։ Ե՛վ Հայաստանի ազգայնականները, և՛ Սփյուռքը ճնշում են սրանց, հետևաբար՝ Չավուշօղլուն, ընդամենը միայն փաստն է արձանագրել։ «Փաստինֆո» լրատվականի հետ զրույցում այս մասին այսօր ասել է հայագետ, Արևմտահայոց հարցերի ուսումնասիրման կենտրոնի տնօրեն Հայկազուն Ալվրցյանը՝ արձագանքելով Չավուշօղլու հայտարարությանը։

Թուրքիայի Արտաքին գործերի նախարար Չավուշօղլուն ԱՄՆ–ում՝ ադրբեջանցի լրագրողների հարցերին պատասխանելիս, մասնավորապես, հայտարարել է, թե Հայաստանի ներսում «արմատականները», իսկ դրսից՝ Սփյուռքը ճնշում են գործադրում Հայաստանի իշխանությունների վրա։

«Թուրքիան, բոլոր առումներով, մեր դարավոր, դասական թշնամին է, որի նպատակը մեզ իսպառ ոչնչացնել է։ Հիմա, վերջապես, նրանց հաջողվել է Հայաստանում իշխանության բերել մի քաղաքական ուժի, որը նպաստում է դրան՝ Հայաստանի, հայության և հայկական պետականության իսպառ ոչնչացմանը։ Հետևաբար, Թուրքիան հիմա անհանգստացած է, որովհետև կոնկրետ քաղաքական ուժերի կոչով, զանգվածներ են դուրս եկել փողոցներ՝ թույլ չտալու մեր վերջնական ոչնչացումը։ Այսինքն, կա վտանգ, որ թուրքական Պանթյուրքիզմի պլանը կարող է տապալվել և սա, իսկապես, անհանգստացրել է թուրքական քաղաքական վերնախավին, որովհետև դա կարող ենք անել միայն մենք, այստեղ՝ Հայաստանում և Սփյուռքը՝ դրսում։ Հետևաբար, սա պետք է ընկալել որպես թուրքերի կողմից մեզ ուղղված շատ ուշադիր և սկզբունքային վերաբերմունք ու աշխատանք»,- ասում է Հայկազուն Ալվրցյանը։

«Փաստինֆո»-ի հետ զրույցում հայագետը պատմել է տարիներ առաջ Թուրքիայում իրեն հանդիպած ծայրահեղական «Գորշ գայլեր»-ի ներկայացուցչի հետ ունեցած երկխոսության մանրամասները.«Տարիներ առաջ, Թուրքիա կատարած այցի ընթացքում, թուրքական բաղնիքում, ես հանդիպեցի տեղի ծայրահեղական «Գորշ Գայլեր» խմբավորման հայտնի դեմքերից մեկին։ Չգիտեի, որ նա «Գորշ գայլեր» խմբավորման հիմնադիր

Արփ Արսլան Թյուքեշի թիկնապահն է։ Քաջ իմանալով ով եմ ես, նա ինձ ասաց՝ դու հիմա իմ հյուրն ես՝ գլխիս վրա տեղ ունենս, բայց պատերազմի դաշտում միակ թշնամիս ես լինելու։ Դուք՝ Դաշնակներդ, իմ ոխերիմ թշնամիներն եք։ Ինչպես որ դուք եք ձեր ազգի ազգայնականը, այնպես էլ մենք՝ «Գորշ քայլերն» են մեր ազգի ազգայնականները։ Այսինքն, «Գորշ գայլերն» իրենց համարում են իրենց ազգի ազգային գաղափարախոսության կրողն ու ազգային ծրագրեր իրականացնող ուժը, հետևաբար, Չավուշօղլու վարքագիծը պետք է մեկնաբանել հենց այս տրամաբանությունից ելնելով»- ասել է հայագետ, Արևմտահայոց հարցերի ուսումնասիրման կենտրոնի տնօրեն Հայկազուն Ալվրցյանը։

Աղբյուր` Փաստինֆո