Փաստ ինֆո

Արմեն Գրիգորյանին ձերբակալման սանկցիա տվող քննիչը պատժվելու է և շատ ծանր կերպով, այնքան ծանր, որ ինքը, նույնիսկ, չի էլ պատկերացնում, իսկ այդ օրը, բոլորովին, սարերի հետևում չէ։ Այս մասին «Փաստինֆո» լրատվականի հետ զրույցում ավելի քան վստահորեն հայտարարում է գրականագետ, Դիմադրության շարժման ակտիվ մասնակից Սերժ Սրապիոնյանը։

«Գիտե՞ք, սրանք երիտթուրքերից ավելի վատն են։ Եթե Թալեաթը Գրիգոր Զոհրաբի գլուխը քարերով կոտրելու հրաման տալուց առաջ, նրան, գոնե, ձևական, բայց համբուրեց, ապա սրանց՝ հայ մտավորականների նկատմամբ իրականացրած կտտանքներն ու հալածանքներն, ուղղակի, անհամեմատելի է՝ նույնիսկ երիտթուրքերի հետ…»,- նշել է նա։

Գրականագետը նկատում է՝ վերջին ժամանակաշրջանի իշխանական վարքն, արդեն, այնքան սովորական է դարձել, որ, նույնիսկ, համատարած ձերբակալություններն, անգամ, զարմանք չեն հարուցում. «Արմեն Գրիգորյանին սրանք շատ վաղուց էին աչքի տակ առել, որովհետև համարձակ կերպով բարձրաձայնում էր իրենց բոլոր տեսակի հակաազգային և դատապարտելի գործողությունների մասին։ Սրանք մշտապես եղել են Արմենի մանրադիտակի տակ։ Նա որևէ անգամ չի կեղծել կամ թաքցրել իր միտքը։ Սրանք երկար սպասեցին, որպեսզի կարողանան ձերբակալել Արմեն Գրիգորյանին, բայց, քանի – որ քիչ, թե շատ խելքը գլխին պատճառաբանություն չգտան, ինչ – որ բան մոգոնելով՝ փակեցին այդ մարդուն։ Ինչ խոսք, Արմենի ձերբակալությունը խիստ ցավալի է, որովհետև մեր շարքերից ևս մեկ համարձակ, ուղղամիտ և ազնիվ մտավորականի ժամանակավորապես մեկուսացրին մեզանից, բայց սա նրանց փրկության բանալին չէ, որովհետև անմիջապես նոր արմեն գրիգորյաններ են հրապարակ ելնելու։ Մեր ժողովուրդն ամուլ չէ, մի բան, որ այս անհեռատես իշխանությունը չի հաշվարկել»։

Սերժ Սրապիոնյանը հավելում է՝ Աշոտ Երկաթին, Չալաբյանին կամ ամիսներ շարունակ օսվենցիսյան տանջանքներով բժիշկ Չարչյանին փակողը, Արմեն Գրիգորյանին, նույնպես, փակելու պլաններ պետք է ունենար, սա անակնկալ չէր։ Արդյո՞ք բազմաթիվ նմանօրինակ դեպքերը քի՞չ են, որպեսզի մենք հասկանանք, թե ում հետ գործ ունենք, հռետորական հարցադրում է բարձրացնում գրականագետը. «Այս մարդիկ ունեն իրենց հատուկ տերերը, ովքեր մոլեռանդ ատելությամբ են լցված հայի ու հայության նկատմամբ։ Մյուս կողմից, սրանց, այսպես կոչված՝ ժողովրդավարությունը, որն, իրականում, ըստ էության՝ ֆաշիզմ է, ուրիշ կերպ դա, ուղղակի, հնարավոր չէ բնութագրել, բերել փաթաթել են մեր վզին։ Եվ, որովհետև Արմեն Գրիգորյանի խոսքն ու ելույթներն, այս կամ այն չափով բացում էին միամիտ մարդկանց աչքերը, ապա նրան պետք էր «վնասազերծել, ինչն էլ արվեց՝ քրեական հերթական անհիմն գործը հարուցելու ճանապարհով»,- ասում է գրականագետը։

Ամփոփելով զրույցը, Սերժ Սրապիոնյանն, այնուամենայնիվ, լավատես է. «Օրեցօր ավելի ու ավելի մարդաշատ դարձող Ֆրանսիայի հրապարակը գալիս է ապացուցելու, որ մարդիկ գնալով հասկանում են՝ այս իշխանությունների կողմից ասված ամեն բան սուտ է։ Երբ նրանք ասում են՝ սիրում եմ ձեզ, պետք է հասկանալ՝ ատում եմ ձեզ, երբ ասում են՝ խոնարհվում եմ ձեր առաջ, նշանակում է՝բարձրանալու եմ ու իմ ողջ ծանրությամբ բազմեմ ձեր ուսերին՝ գրաստի նման քշելու ձեզ։ Երբ հայտարարվում է, թե ոչ մի հարց առանց ժողովրդի հետ խորհրդակցելու չի լուծվելու, սա նշանակում է, որ ես ձեր մեջքի հետևում դավադիր ու դավաճանական որոշումներ եմ կայացնելու, հայրենավաճառ և հայրենադավ թղթեր եմ ստորագրելու, ոնց ուզենամ, այնպես էլ անելու եմ։ Բայց մոտեցել է հատուցման և պատասխան տալու ժամանակը։ Ի վերջո` ժողովուրդն արթնացել է և այս արթնացումն, այլևս, անկասելի է լինելու»,- ասում է գրականագետը։

Աղբյուր` Փաստինֆո