Փաստ ինֆո

Երևանի ընդհանուր իրավասության դատարանում՝ դատավոր Արմեն Պողոսյանի նախագահությամբ, մեկնարկել է Արցախյան երրորդ՝ 44-օրյա պատերազմում նահատակված Մխիթար Գալեյանի հորեղբոր՝ Արթուր Գալեյանի նկատմամբ կալանավորումը որպես խափանման միջոց ընտրելու մասին միջնորդության քննությունը։ Միևնույն ժամանակ դատարանը քննում է Գալեյանի ձերբակալման իրավաչափության հարցը։

Հատկանշական է, որ Գալեյանին ձերբակալելու որոշումը կայացվել է այն պայմաններում, երբ վերջինս ինքնակամ էր ներկայացել ԶՔԳՎ։

Փաստաբան Վահան Հովհաննիսյանը հայտնեց, որ մեղադրանքի շուրջ Արթուր Գալեյանը դիրքորոշում չի հայտնել, քանի որ մեղադրանքը պարզ չէ, քննիչն էլ՝ չի պարզաբանել։ Անդրադառնալով Գարիկ Գալեյանի առողջական վիճակին՝ փաստաբանը տեղեկացրեց, Գալիկյանը դեռևս հիվանդանոցում է, վիճակը ծանր է, փորձել են հարցաքննել, բայց ի վիճակի չի եղել։

Հիշեցնենք, որ երեկ ՔԿ ԶՔԳՎ-ում քննվող քրեական գործով ձերբակալվել են Մխիթար Գալեյանի հայրը՝ Գարիկ Գալեյանը, և վերջինիս եղբայրը՝ Արթուր Գալեյանը։ Գալեյաններին մեղադրանք է առաջադրվել 327.6-րդ հոդվածի 3-րդ մասի 1-ին կետով, 137.1-րդ հոդվածի 1-ին մասով և 316-րդ հոդվածի 1-ին մասով։ Ի սկզբանե, նախաքննական մարմինը որոշել էր Գարիկ Գալեյանին կալանավորելու միջնորդություն ներկայացնել, սակայն հանրային ընդվզումից հետո նրա նկատմամբ որպես խափանման միջոց է կիրառել ստորագրությունը՝ չհեռանալու մասին։

Գարիկ Գալեյանին ազատ արձակելու պահանջ էին ներկայացրել զոհված զինծառայողների հարազատները, նրանք հավաքվել էին ԶՔԳՎ շենքի մոտ։ Ընդ որում՝ Գարիկ Գալեյանը տեղափոխվել էր հիվանդանոց՝ սրտի խնդիրների պատճառով, նրա համար անձնական երաշխավորություն էին ներկայացրել ընդդիմադիր պատգամավորներ։ Արդյունքում՝ երեկոյան հայտնի դարձավ, որ նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Փոխարենը ձերբակալվել է Գ. Գալեյանի եղբայրը, որը անձամբ էր գնացել քննչական ու ժամը 15-ից մինչեւ 20-ը գտնվել է զինվորական քննչական գլխավոր վարչության բակում՝ իմանալով հանդերձ, որ կա իրեն ձերբակալելու որոշում։

Նկատենք, որ երեկ զոհված զինծառայողների հարազատները շրջապատել էին ԶՔԳՎ շենքը՝ պահանջելով ազատ արձակել Արթուր Գալեյանին ու ժամեր շարունակ վերջինիս չէին կարողացել տեղափոխել ՁՊՎ։ Լարված վիճակը հանգուցալուծվել է պատգամավորների միջամտության արդյունքում։ «Պատիվ ունեմ» խմբակցության ղեկավար Արթուր Վանեցյանը ուշ ժամի կրկին հանդիպել է ԶՔԳՎ-ում գտնվող Ա. Գալեյանին, որն այնուհետեւ Վանեցյանի ուղեկցությամբ դուրս է եկել շենքի բակ ու խնդրել զոհված զինծառայողների հարազատներին ապաշրջափակել շենքը, գնալ տուն ու այսօր գալ դատարանի մոտ։ Ա. Վանեցյանն էլ խոստացել էր, որ մենակ չեն թողնելու՝ երաշխավորելով իրենց աջակցությունը։

Այսօր դատարանում արդեն սկսվել է թե ձերբակալության դեմ բողոքի, թե նրան կալանավորելու քննիչի միջնորդությունը։ Ծնողները, փաստաբաններն ու հասարակության տարբեր շերտերը համոզված են, որ քրեական գործը շինծու է։ Փաստաբան Վահան Հովհաննիսյանն այսօր դատարանի բակում հայտարարել է, որ Ա.Գալեյանին արգելանքի տակ պահելու որեւէ հիմք չկա, իսկ, եթե, այդուհանդերձ, նրան կալանավորելու որոշում կայացվի, ապա խոստացավ նիստից անմիջապես հետո տեսանյութ հրապարակել, որից պարզ կլինի, թե ինչ է մեղսագրվում նահատակված հերոսի հորեղբորը։

Հեղինակ՝ Իզաբել Սահակյան

Աղբյուր` Փաստինֆո