Փաստ ինֆո

Իշխանություններն ընդդիմության շարժման մեկնարկին հույսը դրել էին, որ շարժումն ինքն իրեն կմարի և, կարծում եմ, սկզբնական փուլում թերագնահատել են «Դիմադրության» շարժման հնարավորությունները, ռեսուրսները, փորձում էին չտեսնելու տալով և արհամարհելով սպասել՝ համոզված լինելով, որ շատ արագ եղած ռեսուրսը սպառվելու է։ Բավականին անսպասելի ընդդիմության ռեսուրսը ոչ միայն կայունացավ, այլ, թեկուզ ոչ մեծ տեմպերով, ավելանալու տենդենց է արձանագրում: «Փաստինֆո»-ի հետ զրույցում նման տեսակետ հայտնեց քաղտեխնոլոգ Վիգեն Հակոբյանը՝ գնահատելով վերջին շրջանում ոստիկանական գործողությունների ակնհայտ ավելի կոշտացումը:

Նրա արձանագրմամբ՝ իշխանությունների մոտ որոշակի շփոթություն է նկատվում, կան որոշակի տարաձայնություններ՝ ինչպես պետք է արձագանքել ընդդիմության զանգվածային միջոցառումներին: Այս պայմաններում իշխանական բուրգը հիմա փորձում է ուժային մեթոդներով կասեցնել զանգվածային միջոցառումների ընդլայնման ակնհայտ տենդենցը, որովհետև իշխանությունը ցունգցվանգային իրավիճակում է, փորձում է ինչ-որ քայլ անի, որպեսզի իրավիճակը կայունացնի, այն տենդենցը, որ կա ՝ դեպի երկիշխանություն իրականություն չդառնա:

Քաղտեխնոլոգը միևնույն ժամանակ նկատում է, որ նման «բիրտ » ուժի կիրառումը, բոլոր քաղաքական կանոնների համաձայն, ավելի է զայրացնում հանրությանը:

ՀՀ-ում գործող արևմտամետ միջազգային կառույցները ոչ միայն չեն արձագանքում այս բռնություններին , այլև իրենց հայտարարությունների տողատակերում աջակցություն են հայտնում ՀՀ գործող իշխանություններին: Օրինակ՝ ԱՄՆ դեսպանը, գործադրվող բռնաճնշումների ֆոնին հայտարարել է՝«Մենք հանձնառու ենք օգնել հայ ժողովրդին կառուցելու այնպիսի ապագա, որի հիմքում ընդհանուր ժողովրդավարական արժեքներն են ու այն ճանապարհը, որ հայ ժողովուրդն ընտրեց 2018 թվականին եւ մեկ անգամ եւս վերահաստատեց 2021 թ. խորհրդարանական ընտրությունների ժամանակ»:

Ըստ Վիգեն Հակոբյանի՝ սա ևս մեկ անգամ ապացուցում է, որ այն արտաքին քաղաքական վեկտորը, որն իրականացնում է Նիկոլ Փաշինյանը, այն լրիվ համահունչ է արևմտյան քաղաքական վեկտորին.
«Ըստ էության, ինչպես Նիկոլ Փաշինյանի համակիր կուսակցությունների ղեկավարներն են նշում, Փաշինյանը փորձում է Հայաստանի արտաքին քաղաքական վեկտորը Ռուսաստանից փոխել դեպի Արևմուտք, սրանով է պայմանավորված նաև այն, որ Նիկոլ Փաշինյանը փորձում է արցախյան և ադրբեջանա-հայկական հարաբերությունների բանակցությունները տեղափոխել ԵՄ, արևմտյան հարթակներ և այլն; Նման պայմաններում, ըստ էության, Արևմուտքը փորձում է Նիկոլ Փաշինյանին երաշխիքներ տալ, որ աչք է փակելու Փաշինյանի վարչախմբի՝ երկրի ներսում ընդդիմության նկատմամբ բիրտ ուժի կիրառմանը; Սա արտացոլվում է նաև արևմտյան ֆոնդերի կողմից սնվող, այսպես կոչված, իրավապաշտպանների, քաղհասարակության և այլ նմանատիպ բջիջների, կազմակերպությունների լռությունը: Սա այսօրվա աշխարհում սովորական պրակտիկա է՝ սրիկա է, բայց՝ մեր սրիկան լինի»,-ասաց քաղտեխնոլոգը:

Նշենք նաև, որ իշխանությունը վերջերս «սպառնում» է՝ զրկել ընդդիմադիր պատգամավորներին մանդատից՝ ԱԺ նիստերից երկար ժամանակ բացակայելու հիմքով:
Մեզ հետ զրույցում քաղտեխնոլոգը նշեց, որ կդժավարանա իրավական առումով հստակ ասել՝ նման իրավասություն ունի իշխանությունը, թե՝ոչ, բայց քաղաքական առումով ընդդիմության՝ խորհրդարան չներկայանալը քաղաքական բոյկոտ է, որի համար չեն կարող մանդատից զրկել.
«Խիստ կասկածում եմ, որ իրավական տեսակետից էլ հնարավոր է քաղաքական ընդդիմությանը, որն, ակնհայտ քաղաքական դրդապատճառներից ելնելով, բոյկոտում է խորհրդարանի աշխատանքները, զրկել մանդատից: Քաղաքական տեսակետից և միջազգային պրակտիկայի տեսակետից՝ անտրամաբանական կլիներ, եթե քաղաքական մեծամասնությունը, որի դեմ այսօր փողոց է դուրս եկել քաղաքական ընդդիմությունը, հնարավորություն ունենա ժողովրդի կողմից ընդունված պատգամավորներին զրկել մանդատից»,-ասաց Հակոբյանը:

Փորձագետը նաև նկատում ՝ իշխանությունը սկսել է վախենալ, որ ընդդիմությունը, եթե այս շարժումն ավելի թափ հավաքի ժամանակի ընթացքում, կփորձի խորհրդարանական մեխանիզմները գործի դնելով հասնել վարչապետի հրաժարականին՝ այդ թվում իշխող մեծամասնությունից անհրաժեշտ պակասող ձայները պոկելու համար, դրա համար նախապես փորձում են ընդդիմության ձայները պակասեցնել, որպեսզի հնարավորինս ապահովագրվեն նման ձևով իշխանությունից զրկվելուց :

Աղբյուր` Փաստինֆո