Փաստ ինֆո

Ոստիկանական զորքերի մայորը քացու տակ է գցել մարտական գործողությունների մասնակից, Մարտական խաչի ասպետ գնդապետին, ասել է՝ «ես գնդապետ շինող եմ»։ Այս մասին Ֆրանսիայի հրապարակում պատմեց Սեյրան Օհանյանը՝ դատապարտելով ոստիկանների գործողությունները։

«Մարտական խաչի ասպետ գնդապետը, կանգնած մայթի վրա, ոստիկանությունն ասում է՝ սրան էլ բռնեք։ Գնդապետն ասում է՝ ինչպե՞ս ես խոսում ինձ հետ, ես բանակի գնդապետ եմ։ Ի՞նչ է ասում ոստիկանական զորքերի մայորը․ հազար անգամ ներողություն եմ խնդրում, իրենց վախկոտ ղեկավարի խոսույթն է դա, ասում է՝ «ես էլ գնդապետ շինող եմ»։ Այնուհետև գցում են քացու տակ, կոշիկներով, ոտքերով հարվածում գլխին, կողքից ասում են՝ ի՞նչ եք անում, չէ՞ որ Մարտական խաչի ասպետ է, ոստիկանական զորքերի մայորը ասում է՝ «թո՛ւ քո Մարտական խաչի վրա», թքում են մարտական գործողությունների մասնակից գնդապետի վրա»,- ասաց Սեյրան Օհանյանը՝ ընդգծելով, որ նման մարդիկ մարտական գործողություններից ճողոպրած մարդիկ են, չի կարող պատահել, որ նման մարդիկ մարտական գործողություններին մասնակցեն։ Նրա խոսքով՝ ոստիկանության մայորը, որին դժվար է մայոր անվանելը, օրինակ է վերցնում Փաշինյանից, որը մուրճ է ճոճում օդում։

«Իր վախկոտ ղեկավարի՞ց պետք է օրինակ վերցնում, որն ասում է՝ մարդկանց պառկեցրեք գետնի վրա, իր վախկոտ ղեկավարի՞ց, որն իր աթոռը պահում ու ասում է՝ թքած ունեմ սահմանի և բանակի վրա։

Ժողովրդի, բոլորիս անունից ասում եմ․ լսի՛ր, մայոր, դու ժողովրդի առաջ պատասխան ես տալու։ Մենք քո դեմքը գիտենք։ Քո ղեկավարի ճոճած մուրճը քո գլխին է ջարդվելու։ Իմ մարտական ընկերների անունից ասում եմ՝ ոտքդ պոկելու ենք, ժամանակը գալլու է դրա»,- ասաց Սեյրան Օհանյանը։

Աղբյուր` Փաստինֆո