Փաստ ինֆո

«Այն, ինչ այս օրերին կատարվում է Երևանի փողոցներում, խիստ մտահոգիչ, ցավալի և դատապարտելի է»,- «Փաստինֆո» լրատվականի հետ զրույցում ասում է Տավուշի թեմի Բերդ համայնքի հոգևոր առաջնորդ տեր Աբել քահանա Քարտաշյանը՝ մեկնաբանելով անհնազանդության խաղաղ ցույցեր իրականացնող քաղաքացիների նկատմամբ ոստիկանական ուժերի ցուցաբերած անընդունելի վարքը։

Վերջինս հավելում է՝ մի կողմից գիտակցում ես, որ իրավապահ համակարգի աշխատակիցները կատարում են իրենց իջեցված հրահանգը, բայց այն, ինչ տեղի է ունենում դրա արդյունքում, խիստ դատապարտելի է. «Կիրակի օրը պատարագի ընթացքում հնչեցված իմ քարոզը հենց այս թեմայով էր՝ օրենքի գերակայության և սիրո։ Օրենքը լավ բան է, օրինապահությունը՝ նույնպես, բայց երբ օրենքը դառնում է բացարձակ գերակա, անհետանում է սերը, ճիշտ այն, ինչ մենք տեսնում ենք վերջին շաբաթների ընթացքում Երևանի փողոցներում»,- ասում է հոգևոր հովիվը։

Պատասխանելով հարցին՝ ինչպես հոգևոր առաջնորդը կարող է մեկնաբանել ոստիկանական ուժերի կողմից բիրտ և անհամաչափ ուժի կիրառումը՝ ոչ միայն պատերազմին մասնակցած և տարբեր աստիճանների հաշմանդամություն ստացած անձանց, այլ նաև պատերազմում զավակներ կորցրած ծնողների նկատմամբ, ովքեր այս օրերին դուրս գալով փողոցներ, արդարացիորեն, բարձրացնում են իրենց զավակների մահվան հանգամանքները քննող հանձնաժողովների և իրավապահ համակարգի պարզաբանումների անհրաժեշտության հարցը՝ այսպիսով՝ փորձելով ստանալ իրենց համար թերևս ամենամտահոգիչ խնդրի պատասխանը՝ ո՞ւմ մեղքով են զոհվել իրենց զավակները, տեր հայրը նկատում է՝ չի կարող պատասխանել այդ հարցին, քանզի, նկարագրված երևույթը բացարձակ դեմ է բոլոր տեսակի հոգևոր և բարոյական օրենքներին։

Աղբյուր` Փաստինֆո