Փաստ ինֆո

«Ես հասկացել եմ ձեր ցավը, ձեր վիշտը և դրա համար իջել եմ այստեղ, քանի որ արտառոց իրավիճակ է»: Դեռ ապրիլի 26-ին դատախազության դիմաց ակցիա իրականացնող 44-օրյա պատերազմում զոհվածների հարազատների հետ հանդիպման ասել էր ՀՀ գլխավոր դատախազ Արթուր Դավթյանը:

Զոհված զինծառայողների ծնողները ՀՀ վարչապետ Նիկոլ Փաշինյանի դեմ քրեական գործ հարուցելու պահանջով դիմել էին դատախազություն և մեր շատ համաքաղաքացիների և անձամբ ինձ համար անպատկերացնելի վստահությամբ սպասում էին դրական արդյունքների։ Փաշինյանն ինքն էր ԱԺ ամբիոնից հայտարարել, որ կարող էր կանգնեցնել պատերազմը, բայց արդյունքը կլիներ նույնը, միայն առանց զոհերի։

Նահատակված հերոսի հայր Գարիկ Գալեյանը նույնիսկ ասել էր, թե՝ միայն գլխավոր դատախազին է հավատում։ Հավատացել էին, քանզի զոհված զինվորների հարազատների հետ հանդիպմանը Արթուր Դավթյանը վստահեցրել էր, թե՝ դատախազական բոլոր հնարավոր գործիքակազմն օգտագործվում է այդ քրեական գործով օբյեկտիվ քննություն իրականացնելու և իրավական գնահատական տալու համար։ Նա ինքն էր հանդիպում առաջարկել զոհված զինվորների հարազատներից 10-ի հետ՝ նրանց առջև հայտարարելով՝ «Ձեր պահանջի արդարացիությունը չի վիճարկվում։
44-օրյա պատերազմի հերոսների հարազատները օրեր շարունակ դատախազի՝ «Ձեր պահանջի արդարացիությունը չի վիճարկվում» բառերի ազդեցության տակ սպասում էին․․․

Եվ ի՞նչ․․․ Ոչինչ․․․ ձերբակալվեց հենց հերոսի հայրը՝ Գալեյանը, որը միամտություն էր ունեցել հավատալու Արթուր Դավթյանին։ Իսկ զոհերի մեղավորն ու պատասխանատուն՝ Փաշինյանը, դարձել է անձեռնմխելի։

Հարցը, թե՝ իր իսկ ինքնախոստովանական ցուցմունքով հարցաքննության և ձերբակալման հայցի պահանջ ներկայացրած քաղաքացի Ն․ Փաշինյանը երբևէ հրավիրվե՞լ է հարցաքննության, առկախված է։ Գլխավոր դատախազի պասով՝ զինդատախազության, ՀՔԾ-ի կամ՝ մեկ այլ կառույցի համապատասխան կոչում ունեցող անձը նրան երբևէ հրավիրե՞լ է հարցաքննության։ Իհարկե՝ ո՛չ։ Ո՛չ, քանի որ գլխավոր դատախազ Արթուր Դավթյանն անձնական պատասխանատվությամբ ստանձնել է 5000 զինվորի կյանք խլած Նիկոլ Փաշինյանի պաշտպանությունը։
Այս «պատվաբեր» գործը նա իր «ճիտին պարտքն» է համարում։

Այսպիսով, երեկ արդեն լույսի պես պարզ ու հստակ էր, որ գլխավոր դատախազ Դավթյանի՝ զոհված հերոսների ծնողների առջև արված հայտարարությունները, թե՝ «Ես հասկացել եմ ձեր ցավը, ձեր վիշտը․․․ Ձեր պահանջի արդարացիությունը չի վիճարկվում» և այլն, ուղղակի փարիսեցիություն էր։ Իսկ իրականում՝ Արթուր Դավթյանը երկու լարի վրա է խաղում՝ մի կողմից Փաշինյանին իր ծառայությունները մատուցելով, մյուս կողմից՝ ծնողների առջև կեղծավոր հայտարարություններով, իբր հանձնարարել է օբյեկտիվ քննություն վարել, մյուս կողմից կանխավ բացառում նրա ձերբակալությունը։

Մինչդեռ իրականում ոչ մի օբյեկտիվ քննություն էլ չկա, քանզի ՀՀ գլխավոր դատախազը կանխավ, վաղօրոք, ինչպես նշեցինք, արդեն իսկ մերժել էր 5000 հայ երիտասարդի մահվան մեջ ինքզինքը մեղադրող և ինքնախոստովանական ցուցմունք տված ՀՀ վարչապետ Նիկոլ Վովայի Փաշինյանին ձերբակալելու հայցը․․․Ասել կուզի՝ եթե անգամ Քյարամյանը հանկարծ որոշի օբյեկտիվ քննություն վարել ու պարզել, որ կա Փաշինյանին ձերբակալելու անհրաժեշտություն, ապա դատախազը բացառել է նման հեռանկարը՝ ասելով, որ ոչ, չես կարող, Վովայիչը իմ հովանու տակ է։ Ի դեպ, նաեւ զրկել է Քյարամյանին՝ Փաշինյանին չձերբակալելու հանգամանքը վերջինիս «վաճառելու» հնարավորությունից։

Դրա համար էլ վերջինս շարունակում է հոգեբանական և ֆիզիկական ճնշումների ենթարկել 44-օրյա պատերազմում հանուն հայրենիքի պաշտպանության զոհված հերոսների հարազատներին։

Աղբյուր` Փաստինֆո