Փաստ ինֆո

«Այն, ինչ այսօր կատարվում է արտարժույթային շուկայում, այսինքն, այն ջանքերը, որով փորձում են արհեստականորեն ամրապնդել դրամը, նպատակ ունի ինչ – որ չափով մեղմել առկա գնաճը, սակայն սա շատ բացասաբար է անդրադառնալու արտահանման շուկայի վրա։ Արդեն այս տարի, տեղական արտադրողներն ու գյուղացիները զգալու են իրենց վրա այդ հետևանքները։ Եթե դրամը թանկանում է, հետևաբար, մեր ապրանքներն ավելի թանկ են դառնում արտաքին շուկայի համար։ Այս տեսակետից՝ հայկական գյուղատնտեսությանն այս տարի կոլապս է սպասվում»,- «Փաստինֆո»-ի հետ զրույցում ասել է բիզնես խորհրդատու Արեն Ապիկյանը։

Հարցին՝ արդյո՞ք երկրում վերջերս գրանցվող նկատելի և արտառոց գնաճը սոցիալական բունտի չի՞ հանգեցնի, վերջինս պատասխանում է՝ բնականաբար, գնաճը միշտ հանգեցնում է մարդկանց ավելի վատ ապրելու կենսամակարդակի. «Երբ գնաճը գերազանցում է եկամուտների աճին, մարդիկ սկսում են ավելի վատ ապրել։ Ընդ որում, Հայաստանում գնաճը հանգեցրել է նրան, որ ազգաբնակչությունը սկսել է խնայել, անգամ, առաջին անհրաժեշտության ապրանքների և սննդամթերքի վրա։ Ավելորդ է ասել, որ երկրում, արդեն, տևական ժամանակ չափազանց մեծ թվով մարդիկ չեն կարողանում իրենց թույլ տալ օգտվել, օրինակ, կաթնամթերքից, մսից և, համեմատաբար, ավելի թանկ համարվող սննդամթերքի մի շարք տեսակներից։ Եթե այս ամենին էլ գումարենք մեր երկրում առկա աղքատության չափազանց բարձր մակարդակը, ապա այս ամենն, ինչ խոսք, Հայաստանում նկատելիորեն իջեցրել է մարդկանց կենսամակարդակը»,- ասում է Արեն Ապիկյանը։

Ամփոփելով զրույցը՝ բիզնես խորհրդատուն նկատում է՝ մենք հասել ենք մի իրավիճակի, երբ սրանից այն կողմ, այլևս, բավարար չէ միայն ինչ-որ քայլեր ձեռնարկել, այդ քայլերը պետք է լինեն խիստ հստակ և վճռական։ Ընդամենը մի փոքր բանականություն և վերլուծական միտք ունեցող մարդն էլ, ըստ վերջինս, պետք է հասկանա, որ այս իշխանությունները երկիրը տանում են դեպի վերջնական կործանման՝ հանձնելով ոչ միայն Արցախը, այլ նաև Հայաստանը։

Մանրամասները՝ տեսանյութում

Աղբյուր` Փաստինֆո