Փաստ ինֆո

ՀՀ գլխավոր դատախազությունը հայտարարել է, որ իրականում մերժել են Նիկոլ Փաշինյանին ձերբակալելու վերաբերյալ միջնորդությունը։

«Առանձին լրատվամիջոցներ «Դատախազը հանձնարարել է գործողություններ ձեռնարկել Փաշինյանին ձերբակալելու միջնորդության ուղղությամբ» վերտառությամբ տեղեկատվություն են հրապարակել, որը որոշակի թյուրընկալումների տեղիք է տալիս:

Գլխավոր դատախազությունը հարկ է համարում պարզաբանել, որ խնդրո առարկա ներկայացված միջնորդությունը քրեական գործի նախաքննության օրինականության նկատմամբ հսկողություն իրականացնող դատախազի կողմից բավարարվել է մասնակի: Մասնավորապես՝ միջնորդության մեջ նշված հանգամանքների ստուգման նպատակով լրիվ, օբյեկտիվ և բազմակողմանի նախաքննություն կատարելու ցուցում տալու մասով այն բավարարվել է, իսկ Նիկոլ Փաշինյանին ձերբակալելու մասով՝ մերժվել այն հիմնավորմամբ, որ միջնորդության մեջ նշված՝ Նիկոլ Փաշինյանի կողմից հանցանք կատարելու մասին փաստական տվյալները, լինելով միջնորդության հեղինակների վերլուծություններն ու հետևությունները, հիմնված են այնպիսի հանգամանքների վրա, որոնք դեռևս ենթակա են քրեական գործով ստուգման։

Եվ հենց քրեական գործի համար նշանակություն ունեցող հանգամանքների պարզման նպատակով անհրաժեշտ գործողությունների կատարումն ապահովելու ուղղությամբ էլ մինչդատական վարույթի նկատմամբ հսկողության շրջանակներում արդեն իսկ ձեռնարկվել են դատախազական ներգործության համապատասխան միջոցներ»,- նշվում է դատախազության հայտարարության մեջ:

Նշենք, որ ավելի վաղ փաստաբան Վահան Հովհաննիսյանը զինվորական քննչական գլխավոր վարչության մոտ հայտարարել էր, որ դատախազությունը հանձնարարություն է տվել քննիչին՝ համապատասխան գործողություններ ձեռնարկել իրենց միջնորդության ուղղությամբ, որով բարձրացրել են Նիկոլ Փաշինյանի ձերբակալության հարցը։

«Վայրկյաններ առաջ մեզ տեղեկացրեցին, որ Զինվորական դատախազության կողմից հասցեագրված գրություն է եկել, համաձայն որի՝ հանձնարարվել է Զինվորական քննչական վարչությանը՝ կատարելու համապատասխան քննչական գործողություններ, որոնք նշված էին մեր միջնորդության մեջ, իսկ մեր միջնորդությունը վերաբերում էր ձերբակալմանը: Քննիչն արդեն ստացել է գրությունը, ուղարկվել է համապատասխան քննչական գործողություններ իրականացնելու նպատակով»,-զոհված զինվորների հարազատների ակցիայի ժամանակ լրագրողների հետ զրույցում հայտարարել էր փաստաբան Վահան Հովհաննիսյանը:

Ավելի ուշ փաստաբանը նաեւ հայտնել էր, որ քննչականում տեղի ունեցած հանդիպման ժամանակ պարզել են, որ զինդատախազությունն ստել է, եւ  իրականում մերժել են Նիկոլ Փաշինյանին ձերբակալելու միջնորդությունը, իսկ որպես մեղադրյալ ներգրավելու եւ հարցաքննելու միջնորդությունը ուղարկել քննչական, որտեղ դրա լուծումը հետաձգվել է։ Արդյունքում լարված իրավիճակ էր ստեղծվել. Քննիչը հայհոյել է զոհված զինծառայողների հարազատներին ու հրմշտելով դուրս հանել շենքից։

Քննիչը հետաձգել է Փաշինյանին հարցաքննելու ու որպես մեղադրյալ ներգրավելու միջնորդության քննարկումը. ԶՔԳՎ-ում հայհոյել ու հրմշտել են ծնողներին (տեսանյութ)

Աղբյուր` Փաստինֆո