Փաստ ինֆո

Հայաստանի՝ Ադրբեջանին ներկայացրած 6 կետերում չկա հստակ պահանջ, որ ադրբեջանական զորքերը պետք է դուրս գան Սյունիքի և Գեղարքունիքի տարածքներից: Նիկոլ Փաշինյանի դեսպան Էդմոն Մարուքյանն ընդամենը նպատակ ուներ մոլորեցնել հասարակությանը և կոծկել սպասվող կործանարար փաստաթուղթը: «Փաստինֆո»-ի հետ զրույցում նման տեսակետ է հայտնել ադրբեջանագետ Գառնիկ Դավթյանը՝ անդրադառնալով Ադրբեջանին Հայաստանի ներկայացրած 6 կետերին, որը վերջերս Հ1- եթերում հրապարակեց հատուկ հանձնարարություններով դեսպան Էդմոն Մարուքյանը:

Փորձագետի տպավորությամբ՝ այս իշխանությունը նպատակ չունի տարատեսակ խնդիրները բարեկարգելու և կորցրածը հետ բերելու, նրանք համակերպվել են այս կորուստների հետ, ավելին՝ պատրաստվում են նոր զիջումների գնալ, ուղղակի այս պահին կա պայքար փողոցում և սա է իրենց խանգարում, որ գնան կործանարար իրենց վերջին քայլերին.

«Նիկոլի դեսպանի կողմից ներկայացված 6 կետերը «կետ» համարելը թյուրիմացություն կլինի և ոչ պրոֆեսիոնալ, որովհետև եթե համեմատենք Ադրբեջանի կողմից ներկայացված 5 կետերի հետ, ապա կտեսնենք, որ ադրբեջանական կողմը հստակ պահանջներ է դրել Հայաստանի առաջ՝ տարածքային ամբողջականության ճանաչում, միմյանց քաղաքական անկախության ճանաչում, բայց հայկական կողմից ոչ մի պահանջ կամ տեսակետ չկար »,-ասաց Գառնիկ Դավթյանը:

Զրուցակիցը հատուկ ուշադրություն հրավիրեց 3-րդ կետի վրա, որտեղ խոսվում է Արցախի կարգավիճակի, արցախահայության անվտանգության և իրավունքների պաշտպանության մասին և ընդգծեց, որ պետք է այդտեղ հստակ նշվեր ժողովուրդների ինքնորոշման իրավունքի մասին, ընդգծվեր, որ հայկական կողմը չի ակնկալում որևէ ձևով Արցախի ընդգրկումը Ադրբեջանի կազմում, պետք է նշվեր, որ սա անհամատեղելի իրականություն է, ըստ փորձագետի, կան բազմաթիվ ապացուցողական փաստեր, որով կարելի էր մերժել Արցախի՝ Ադրբեջանի կազմում լինելու տրամաբանությունը, բայց դա չարվեց:

Բացի սա՝ փորձագետը նաև նկատում է, որ հրապարակված կետերում նշվում է, որ Հելսինկյան եզրափակիչ ակտի և ՄԱԿ-ի կանոնադրության համապատասխան են հարաբերությունները կարգավորվում, բայց նույն Հելսինկյան եզրափակիչ ակտում կա նաև տարածքային ամբողջականության սկզբունք, իսկ Ադրբեջանի 5 կետերում միայն միակողմանի է պահանջը դրված.

«Իրենք խոսում են միայն տարածքային ամբողջականության մասին, իսկ մենք դրա մասին չենք խոսում, ի՞նչ է, Հայաստանը ստանձնել է բարի դեսպանի կեցվածք, պետք է ստանձնել իր պետական շահերի պաշտպանության կեցվածք»,-ասաց Դավթյանը:

Ինչ վերաբերում է այն կետին, որ Հայաստանը Ադրբեջանից տարածքային պահանջներ չունի, փորձագետը նշեց՝ տարածքային ամբողջականության ճանաչումը լինում է միայն մեկ ձևով՝ հարաբերությունների հաստատման, իսկ Հայաստանն Ադրբեջանի հետ երբեք չի ունեցել հարաբերություններ՝ պաշտոնական մակարդակում, միջազգային կառույցներին անդամակցությունը չի ենթադրում, որ դու ընդունում ես քո հարևանի տարածքային ամբողջականությունը.

«Մեր անդամակցությունը միջազգային կազմակերպություններին մշտապես եղել են վերապահմամբ, այն կազմակերպությունները , որոնց կանոնադրության մեջ հստակ նշված է, որ տարածքային ամբողջականության հիման վրա է գործում այն, մենք վերապահմամբ են դա արել»,-ասաց Դավթյանը:

Նշենք, որ «Դիմադրության» շարժման պայքարի առաջին իսկ օրից՝ ադրբեջանական մամուլում հաճախ են հանդիպում նյութեր, որտեղ իրենց անթաքույց աջակցություն են հայտնում ՀՀ գործող իշխանություններին, և քննադատում ընդդիմությանը՝ մասնավորապես նշելով, թե նրանց իշխանության գալու դեպքում չեն բանակցիՀայաստանի հետ:

Ըստ փորձագետի՝ «սրանք Նիկոլ Փաշինյանին պաշտպանելու վերջին ճիգերն են».

«Նրան ծառայություններ են մատուցում՝ հետագայում ակնկալելով ավելի մեծ ծառայություն Նիկոլ Փաշինյանի կողմից, տարածքային զիջումներ. ոչ մի պետություն չի կարող խառնվել այլ պետության ներքին գործերին, այստեղ տեղ են ունենում անհնազանդության ակցիաներ, կան ընդդիմադիր մարդիկ, որոնք դեմ են այս իշխանություններին, յուրաքանչյուր պետություն պետք է հաշվի նստի ժողովրդի հետ, մենք սահմանադրական ճանապարհով գնում ենք փոփոխությունների, և եթե դա տեղի ունենա, Ադրբեջան չէ, Մարսում գործող այլ պետություն լինի, պետք է հաշվի նստի սրա հետ և ուզի- չուզի առկա փաթեթով՝ նոյեմբերի 9-ի և հունվարի 11-ի փաստաթղթերով ,պետք է բանակցի, ակնառու փաստ է, որ երկում տեղի ունեցող սահմանադրորեն իշխանության փոփոխությունները դրանք ընդունվում են միջազգային հանրության կողմից, Ադրբեջանն ուղղակի շատ փոքր պետություն է, որպեսզի ընդունված կարգին դեմ գնա և հրաժարվի բանակցել Հայաստանի հետ, կստացվի որ ինքն անձամբ հրաժարվում է նոյեմբերի 9-ի փաստաթղթով ստացված իր պարտավորություններից Հայաստանի, ոչ թե Նիկոլ Փաշինյանի կողմից ընդունված փաստաթղթող»,,-ասաց զրուցակիցը:

Փորձագետը նշեց, որ սա նաև միջամտություն է Հայաստանի ներքաղաքական կյանքին։

«Յուրաքանչյուր արժանապատիվ իշխանություն թշնամի պետության նման վարքագծին պատասխան կտար , բայց քանի սրանք դրածո իշխանություններ են, դրա համար լռում են և իրենց գործունեությամբ ու Ադրբեջանի հայտարարություններով , փորձում են հանրության մոտ տպավորություն ստեղծել, թե տեսեք՝ ադրբեջանցի պաշտոնյաները նման բան են ասում, ուրեմն գիտեն՝ ինչ են ասում: Մանկապարտեզի այս վարքագիծը շարունակվում է և ավելի մեծ վտանգի առաջ է կանգնեցնում մեր հանրությանը»,- ասել է նա:

Աղբյուր` Փաստինֆո