Փաստ ինֆո

Երևանում այսօր վաղ առավոտից երթևեկությունը կաթվածահար էր: «Դիմադրության» շարժումն առավոտյան 08.00-ից վերսկել էր անհնազանդության ակցիաները՝ Երևանի տարբեր հատվածներում փողոցները, այնպես էլ ծայրամասերի. Անհնազանդության ակցիաներ են եղել գրեթե բոլոր վարչական շրջաններում՝ հասարակական ու քաղաքական տարբեր ուժերի, ուսանողների, բնակիչների մասնակցությամբ։ 

Ժամը 09։20-ի դրությամբ՝ Իշխան Սաղաթելյանը հայտարարեց, որ փակ է ավելի քան 50 փողոց, սակայն անհնազանդության ակցիաները դրանից հետո շարունակվել են մինչեւ 11։30։

Իրավիճակը պարբերաբար լարվել է, ոստիկանները բռնի ուժով բերման են ենթարկում խաղաղ ակցիայի մասնակիցներին, ընդ որում՝ մեծամասամբ առանց նախազգուշացնելու։ Ավելին, տեսանյութերում տեսանելի է, որ ոստիկանները բավական կոշտ են գտնվել նաեւ երթ իրականացնողների նկատմամբ, որոնց ճանապարհը փակում էին մեքենաներով ու առանց որեւէ բառ ասելու անմիջապես անցնում բերման ենթարկելուն, ընդ որում՝ բիրտ ուժի գործադրմամբ:

«Փաստինֆո»-ին Ոստիկանությունից հայտնել էին, որ վերջին տվյալներով բերման ենթարկվածների թիվը հասել է 417-ի: Բերման ենթարկվածների թվում էին՝ ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը, Յուրի Խաչատուրովի որդին՝ Իգոր Խաչատրյանը, ԱԺ նախկին պատգամավորներ Արմեն Աշոտյանը, Նաիրա Զոհրաբյանը,«Հայրենիք» կուսակցության անդամներ Սոս Հակոբյանը, Խաչիկ Գալստյանը և այլք։ Քաղաքացիների փոխանցմամբ՝ ոստիկանական շատ բաժիններում անգամ տեղ չի եղել, և բերման ենթարկվածներին ավտոբուսներով տեղափոխել են այլ բաժիններ, սպասեցրել բակերում՝ մինչեւ ոստիկանության բաժիններում հնարավոր կլիներ նրանց ընդունել։

Ոստիկանները բերման ենթարկելիս բռնի ուժ էին գործադրում անգամ պատգամավորների, անչափահասների, տարեցների ու կանանց նկատմամբ, որոշ դեպքերում նաև մարմնական վնասվածքներ էին հասցրել ցուցարարներին: Համենայն դեպս, հայտնի է, որ ոստիկանության գործողությունների հետեւանքով ձեռքի կոտրվածք է ստացել 77-ամյա մի կին։

Ժամը 11։30-ին անհնազանդության ակցիաները դադարեցվել են, բացվել ճանապարհները, իսկ ժամը 19-ին նախատեսված է հանրահավաքը Ֆրանսիայի հրապարակում։

Սակայն մայրաքաղաքում լարվածությունը չի մարել. Բողոքի ակցիաներ են իրականացնում զոհված զինծառայողների հարազատները, որոնք նախ փակել են վերաքննիչ քրեական դատարանի շենքին հարող պողոտան, ապա ԶՔԳՎ շենքի դիմացի փողոցը՝ Բաբայանը՝ պահանջելով ձերբակալել Նիկոլ Փաշինյանին։

Աղբյուր` Փաստինֆո