Փաստ ինֆո

«Իմ անձնական կարծիքով, այս այցը չարդարացրեց այն սպասելիքները, որ իշխանություններն ու մերձիշխանական շրջանակները կարող էին ունենալ՝ մինչ Փաշինյանի Մոսկվա մեկնումը։ Հավանաբար, նրանք հույս ունեին, որ Փաշինյանն այնտեղ ջերմ ընդունելության կարժանանա, որը, որպես խաղաքարտ, կօգտագործվի, հատկապես ներքաղաքական լարված իրավիճակում, բայց այդպես չեղավ»,-«Փաստինֆո»-ի հետ զրույցում այս մասին ասում է միջազգայնագետ Գրիգոր Բալասանյանը։

Հիշեցնենք, որ երեկ Մոսկվայում տեղի էր ունեցել ՀԱՊԿ գագաթաժողովը, որին՝ միջոցառումը վարողի կարգավիճակով մասնակցում էր նաև Նիկոլ Փաշինյանը, որի ժամանակ քննադատել էր կառույցի գործունեությունը՝ հայտարարելով, թե Հայաստանը չի ստացել ՀԱՊԿ-ից այն սպասելիքները, որ ունեցել է անցյալ տարի մայիսին, երբ Ադրբեջանը ներխուժել էր ՀՀ ինքնիշխան տարածք։

Գրիգոր Բալասանյանը նկատում է՝ ինչպե՞ս կարող է Փաշինյանը բողոքել ՀԱՊԿ-ից այն բանի համար, որ չի արդարացրել հայկական կողմի սպասելիքները, երբ Հայաստանը պաշտոնապես կառույցին դիմել է իրավիճակին ոչ համարժեք 2-րդ հոդվածով, այնինչ, անցյալ տարի մայիս ամսվա ընթացքում, երբ ադրբեջանական զինված ուժերը ներխուժեցին ՀՀ սուվերեն տարածք և տեղակայվեցին Սյունիքի՝ Սև լճի հատվածում, ՀԱՊԿ կառույցին անհրաժեշտ էր դիմել 4-րդ հոդվածի դրույթներով. «Ուրեմն, ինչի՞ց է բողոքում այս մարդը, այն էլ՝ գագաթաժողովի ընթացքում, հրապարակային կերպով, այնինչ, սա մի հարց էր, որը կարելի է քննարկել առանձնազրույցի ժամանակ։ Հետո, երբ Փաշինյանը հայտարարում է, թե ողջ տարին ձյունով ծածկված սարերի համար նպատակահարմար չի գտնում կոնֆլիկտի մեջ մտնել Ադրբեջանի հետ, հիմա ի՞նչ նպատակով է ՀԱՊԿ-ի նիստում հրապարակային բողոքում, թե չեն արդարացրել իրենց սպասելիքները»,- ասում է միջազգայնագետը։

Վերադառնալով Փաշինյանի կրեմլյան ընդունելության թեմային՝ Գրիգոր Բալասանյանը նկատում է՝ Մոսկվայում, վստահաբար, չեն մոռացել ՀԱՊԿ-ի գլխավոր քարտուղար Խաչատուրովի հետ կապված սկանդալը, որ տեղի ունեցավ հայաստանյան օրվա իշխանությունների նախաձեռնությամբ՝ արատավորելու համար այդ կառույցի համբավը. «Հաջորդ միջադեպը, որ կարող էր նման ընդունելության պատճառ հանդիսանալ՝ Էդմոն Մարուքյանի, վերջերս հանրային հեռուստատեսության եթերում արված հայտարարություն էր՝ կապված Ադրբեջանին ի պատասխան, հայկական կողմի հրապարակած վեցը կետերի հետ։ Փաշինյանի մոսկովյան այցի նախօրեին հանրային հեռուստաընկերությամբ այդ մասին հայտարարելը,կարծում եմ, կարող ենք որակել որպես «քայլ ձիով»՝ այն շրջանակների կողմից, ովքեր առաջին հերթին վատություն արեցին հենց Փաշինյանին։ Ակնհայտ է, որ այսպիսի քայլը, որևէ կերպ, դրականորեն չէը ընկալվելու կամ ընդունվելու Մոսկվայում»,- ասում է Գրիգոր Բալասանյանը։

Հարցին՝ արդյո՞ք հերթական հակառուսական պատվերն է կատարում Փաշինյանը՝ ՀԱՊԿ գագաթաժողովի ընթացքում, հրապարակային կերպով քննադատելով կառույցի գործունեությունը, այն պարագայում, երբ Բելառուսի նախագահ Լուկաշենկոն նույն նիստի ընթացքում հատուկ ընդգծել էր՝ ստեղծված իրավիճակով պայմանավորված, ՀԱՊԿ անդամ երկրները պետք է առավելագույն փոխըմբռնում և միասնության ոգի դրսևորեն՝ դիմակայելու այն մարտահրավերներին, որ նետված են այդ երկրների առաջ, Գրիգոր Բալասանյանը պատասխանում է՝ այն օպերացիան, որ մշակել էր Փաշինյանը՝ հերթական անգամ անհարմար վիճակի մեջ դնելով կառույցի հեղինակությունը, կարելի է համարել լիովին տապալված։

Աղբյուր` Փաստինֆո