Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի որդիների գույքի վրա դրված արգելանքը վերացնելու մասին միջնորդություն է ներկայացվել դատարան։ «Փաստինֆո»֊ի թղթակցի հաղորդմամբ՝ դատարան միջնորդությունը ներկայացրել է փաստաբան Հակոբ Ենոքյանը, որը սույն դատական վարույթում ներգրավված չէ, սակայն հանդիսանում է Աղվան Հովսեփյանի որդիների ներկայացուցիչը և միջնորդությունը ներկայացրել է՝ շահագրգիռ դիմողի կարգավիճակով։ Միջնորդությամբ փաստաբանը պահանջել է վերացնել մինչդատական վարույթում գույքի վրա արգելանք դնելու մասին որոշումները։ Դատարանը միջնորդությունն ըստ էության չքննեց, մինչ այդ՝ քննարկեց միջնորդությունը քննարկման առարկա դարձնելու հարցը։ Մեղադրող կողմն առարկել է միջնորդությունն այս փուլում քննարկելու դեմ՝ նշելով, որ ներկայումս առկա է բողոք, որը դեռևս քննության փուլում է, իսկ պաշտպանության կողմն էլ արձանագրել է, որ դեռեւս մինչդատական վարույթում բողոքարկվել է գույքի վրա արգելանք դնելու որոշումը և այժմ ստացվեց այնպես, որ գործը մեղադրական եզրակացությամբ ուղարկվել է դատարան, վարույթն իրականացնող մարմինը դատարանն է, ոչ թե՝ Հակակոռուպցիոն կոմիտեն, իսկ մինչդատական վարույթի ընթացքում դատարանը չի կարող այս դատարանին պարտավորեցնել վերացնել իրավունքների խախտումը։

Նախագահող դատավորը որոշեց միջնորդությունը հետաձգել՝ մինչև էական հանգամանքների պարզումը՝ առնվազն մինչև ապացույցների հետազոտման փուլի ավարտը, իսկ եթե բավարար հիմքերն այդ փուլում չլինի, դրան կանդրադառնա ճառերում։ Հայտարարությամբ հանդես եկավ նաև Աղվան Հովսեփյանը՝ անդրադառնալով նախորդ դատական նիստին մեղադրող դատախազներից Կորյուն Սերոբյանի հայտարարությանը, որով վերջինս խեղաթյուրել էր Հովսեփյանի խոսքերը՝ նշելով, թե Հովսեփյանն ընդունել է, որ հանցանք է կատարվել։ Հովսեփյանը հիշեցրեց իր նախորդ խոսքը՝ նշելով, որ ինքն ասել էր դեպքերը տեղի են ունեցել 10-12 տարի առաջ և հորդորեց դատախազին չփորձել այլևս երբեք «բռնել» իրեն և տարբերել դեպքերն ու հանցանքը, ինչի համար պետք է գնալ գրադարան։
«Իմ աչքի առաջ, դատարանի աչքի առաջ փորձում եք նորից փուչիկ փչե՞լ։ Երբեք չփորձեք մյուս անգամ նման բան անել։ Եւ խորհուրդ կտայի՝ որպես մեղադրողի, որ եթե մի բան չգիտեք՝ ավելի լավ է լռեք, դա ձեզ ավելի խորհրդավոր կդարձնի»,- դատարանում հայտարարել է Աղվան Հովսեփյանը դիմելով դատախազին։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո