Փաստ ինֆո

Խաղաղ ավտոերթին հեծանիվով մասնակցած, երեք պատերազմի մասնակից Գեորգի Արիստակեսյանը՝ Ժորա պապիկը, ձերբակալվեց։ Այս մասին «Փաստինֆո»-ն տեղեկանում է փաստաբան Միքայել Շխիմյանից։ 

Ինչպես արդեն տեղեկացրել ենք՝ այսօր Երևանում իրականացված խաղաղ ակցիաների՝ ավտոերթերի, ընթացքում ոստիկանները քաշքշելով բերման են ենթարկել նաև տարեց 65-ամյա տղամարդու՝ Գեորգի Արիստակեսյանին, որը երեք պատերազմների մասնակից է, իսկ ավտոերթին մասնակցում էր հեծանիվով։ Ընդ որում, տարածված տեսանյութերից երևում է, թե ինչպես են ոստիկանները տարեց տղամարդու նկատմամբ ուժ կիրառում, պառկեցնում ասֆալտին, բռնություն գործադրում։

Փաստաբան Միքայել Շխիմյանը հայտնեց, որ Արիստակեսյանը ձերբակալվել է ՀՀ քրեական օրենսգրքի 316-րդ հոդվածի 1-ին մասով՝ իշխանության ներկայացուցչի նկատմամբ դիմադրության և ծանր վիրավորանքի հատկանիշներով։ Արիստակեսյանը պնդել է, որ ոչ մեկին ոչ հայհոյել է, ոչ էլ՝ հարվածել, խաղաղ ավտոերթին է մասնակցել, այն էլ՝ հեծանիվով։ Ձերբակալման իրավաչափության հարցը կվիճարկվի։

Ի դեպ, Արիստակեսյանի դեմքին և մարմնի այլ հատվածներում առկա են մարմնական վնասվածքներ, Արիստակեսյանն ունի ուժեղ գլխացավեր, ոտքը ևս վնասվել է։ Շտապօգնության ավտոմեքենա է ժամանել ոստիկանության բաժանմունք՝ Արիստակեսյանի առողջական վիճակը և առկա վնասվածքներն արձանագրելու։ Իր նկատմամբ բռնություն գործադրելու փաստի առթիվ Արիստակեսյանն արդեն հանցագործության մասին հաղորդում է ներկայացրել։

Հեղինակ՝ Իզաբել Սահակյան

Աղբյուր` Փաստինֆո