Փաստ ինֆո

«Հայաստան» խմբակցության պատգամավոր Արամ Վարդևանյանը ճեպազրույցի ժամանակ անդրադարձել է «Դիմադրության» շարժման այսօրվա ավտոերթի ընթացքում ոստիկանական բիրտ գործողություններին:

Պատգամավորն ընդգծեց, որ ավտոերթը հավաքների ազատության սահմանադրական իրավունքի իրացման ձևերից մեկն է, այն բացառապես օրինական է և իրավաչափ, ուստի ոստիկանական միջամտություն չի կարող կիրառվել.

«Առավել ևս՝ կարմիր և այլ գույնի բերետավորների միջամտություն չի կարող տեղի ունենալ, բայց տեսանք ճիշտ հակառակը»,-ասաց Վարդևանյանը:

Նրա հաղորդմամբ՝ ոստիկաններն այսօրվա ավտոերթի ժամանակ բռնի ուժ են կիրառել պատերազմի մասնակից 75-ամյա Գեորգի Արիստակեսյանի նկատմամբ, նաև անձնական վիրավորանք են հնչեցրել նրա հասցեին.

«Նա ավտոերթին մասնակցել է հեծանիվով, ոստիկանները 6 հոգով ուժ են կիրառել, հիմա նրա նկատմամբ քրեական գործ են հարուցում և ձերբակալում,  որ նա, լինելով շոկային իրավիճակում, դիմադրել է ոստիկանների՝ ոհմակի պես հարձակմանը, փորձել է հասկանալ՝ ի՞նչ է կատարվում: Մենք այսպիսի իրականություն ունենք։ Ոստիկանների այսօրվա արարքներն իրենց մեջ պարունակում են քրեական օրենսգրքի լիազորությունների անցումից մինչև չարաշահում, և այլ հոդվածների հատկանիշներ, նույնիսկ մարդու առևանգման հանցակազմի հատկանիշ էլ կարող ենք տեսնել», -ասաց պատգամավորը:

Վարդևանյանի խոսքով՝ շուրջ 60-80 ոստիկան ապօրինությունների են դիմում և «առնչություն չունեն ոստիկանի պատվի և ծառայության հետ».

«Այդ մարդկանցից յուրաքանչյուրի անունը, ազգանունը մենք արձանագրում ենք, այդ ոստիկանները պատժվելու և պատասխանատվության են ենթարկվելու: Իրենք ոչ միայն հեռացվելու են համակարգից, այլ երբևէ հնարավորություն չեն ունենալու լինել պետական ծառայության մեջ»,-հայտարարեց Վարդևանյանը:

Աղբյուր` Փաստինֆո