Փաստ ինֆո

ԱԺ «Հայաստան» խմբակցության պատգամավոր, ՀՅԴ անդամ Գեղամ Մանուկյանի որդին՝ Տարոն Մանուկյանը, կալանավորվեց ։ Շիրակի մարզի ընդհանուր իրավասության դատարանը՝ դատավոր Արտյոմ Ավետիսյանի նախագահությամբ, բավարարեց Տարոն Մանուկյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը, միևնույն ժամանակ, ճանաչելով Մանուկյանի ձերբակալությունը իրավաչափ ։ Այս մասին «Փաստինֆո»-ի հետ զրույցում հայտնեց փաստաբան Աբգար Պողոսյանը՝ հավելելով, որ դատարանի որոշման դեմ բողոք կներկայացվի։

Ինչպես արդեն տեղեկացրել ենք՝ Տարոն Մանուկյանը ձերբակալվել է մայիսի 8-ին Գյումրիում Երևանյան խճուղում գտնվող հասարակական տրանսպորտի կանգառում միջադեպ-վիճաբանության գործի շրջանակներում։ Քննիչը միջնորդություն է ներկայացրել դատարան՝ Մանուկյանի նկատմամբ կալանավորումը որպես խափանման միջոց կիրառելու վերաբերյալ։

Փաստաբան Աբգար Պողոսյանը «Փաստինֆո»-ի հետ զրույցում հայտնեց, որ վիճարկել են ձերբակալման իրավաչափության հարցը։ Մասնավորապես, որպես ձերբակալման նպատակ մատնանշվել էր թաքնվելու հավանականության զսպումը, մինչդեռ Մանուկյանն ինքնակամ է ներկայացել։

«Իրենք մեկնաբանում են, որ դեպքի վայրը լքելը ևս առկա է, սակայն Տարոնը ոչ թե լքել է դեպքի վայրը, այլ՝ շարունակել է մասնակցել ակցիային։ Այսինքն՝ այլ հարց է, որ ինքը դեպքից հետո թաքնվեր, նա շարունակել է մասնակցել ակցիաներին, գտնվել է հանրային վայրերում, ինչից հետո ԶԼՄ հրապարակումներից իմացել է, որ քրեական գործ կա և ինքնակամ ներկայացել է»,- նշեց փաստաբանը։

Ինչ վերաբերում է կալանավորման միջնորդությանը, ապա քննիչը մատնանշել է գործի քննությանը խոչընդոտելու և նոր հանցանք կատարելու հավանականությունը, պաշպանության կողմն էլ ներկայացրել առարկությունները՝ ինչպես հիմքերի, այնպես էլ՝ հիմնավոր կասկածի մասով։ Նոր հանցանք կատարելու հավանականությունը մեկնաբանել է իրականացվող ակցիաներով, մասնավորապես, Երևանում իրականացվող ակցիաների վերաբերյալ արդեն հարուցվել է քրեական գործ՝ խուլիգանության հատկանիշներով, ըստ քննիչի՝ այդ ակցիայի մասնակցել է նաև Տարոնը և չի բացառվում, որ հետագայում գործով կարգավիճակ ունենա, ինչպես նաև մասնակցի այլ ակցիաների, մինչդեռ, պաշտպանության կողմը նշել է, որ այդպես խախտվում է անձի անմեղության կանխավարկածը, որևէ գործով Տարոնը մեղադրանքը չի ընդունում։ Քրեական գործով տուժող ճանաչված տարեց տղամարդկանց հետ առերես հարցաքննություն դեռևս տեղի չի ունեցել, իսկ ինչ վերաբերում է գործով ապացույցներին՝ Պողոսյանը հայտնեց, որ գործում առկա են մի շարք ոստիկանների ցուցմունքներ, որոնք, ըստ փաստաբանի, անհեթեթ են։

«Այսինքն, Երևան քաղաքի վարչության բաժանմունքներից մեկի պետը ցուցմունք է տվել, որ ինքը շատ է ասուլիսներ նայում, իսկ ասուլիսներում գրվում է անձանց անուն-ազգանունը, այդպես իր մոտ տպավորվել է Տարոնը և մի քանի անձինք, տեսանյութը, որ տեսել է, ճանաչել է։ Դրանից անհեթեթ բան հորինելն անհնար է։ Անձին լուսանկարով ճանաչման են ներկայացրել տուժողին, ներկայացվել է չորս լուսանկար, որից տուժողը պետք է ճանաչեր Տարոնին։ Տրամաբանությունն այն է, որ չորս նկարներում պատկերված անձինք պետք է միմյանց հնարավորինս նման լինեն, իսկ մեր դեպքում՝ չորսից երեքը սափրված են, միայն Տարոնն է, որ սափրված չէր։ Դրանից վատ մեկ էլ կարող էր լինել, որ միայն Տարոնի նկարը ցույց տան»,- նշեց փաստաբանը՝ հավելելով, որ ի սկզբանե քննությունն ուղղորդված է եղել։

Նրա փոխանցմամբ՝ եղել են ցուցմունքներ, որով տուժողները հայհոյանքներ են հնչեցրել, որով նույն անձը կոորդինացրել է գործողությունը, սակայն հայտնի չէ, որ ինչ-որ քննություն իրականացված լինի։

Ինչ վերաբերում է քրեական գործի հարուցման առիթին, ապա այն հարուցվել է համացանցում տարածված տեսանյութի հիման վրա Ոստիկանության Կումայրիի բաժնի ծառայողի ներկայացրած զեկուցագրից հետո, սակայն տեսանյութի աղբյուրը հայտնի չէ։ Պաշտպանը տեղեկացրեց, որ խափանման միջոցի հարցի քննության ընթացքում բարձրացվել է նշված հարցը, պաշտպանության կողմի ձեռքի տակ առկա նյութերով՝ միջոցներ չի ձեռնարկվել աղբյուրը՝ տեսանյութի բնօրինակը հայտնաբերելու ուղղությամբ։ Պաշտպանության կողմը հետագայում կմիջնորդի փորձաքննության ենթարկել տեսանյութը։

Հիշեցնենք, որ մայիսի 8-ին ընդդիմադիր գործիչների նախաձեռնությամբ Գյումրիում հանրահավաք է եղել։ Նույն օրը Գյումրու Երևանյան խճուղում գտնվող հասարակական տրանսպորտի կանգառում միջադեպ-վիճաբանություն է տեղի ունեցել։ Մասնավորապես, կանգառում կանգնած տարեց տղամարդիկ՝ 74, 56, 72 և 84 տարեկան, հայհոյանքներ են հնչեցրել դաշնակցական երիտասարդների հասցեին, ձվեր նետել վերջիններիս ուղղությամբ, ինչից հետո վիճաբանություն է տեղի ունեցել։ Դեպքի առթիվ հարուցվել է քրեական գործ, տարեց տղամարդիկ տուժող են ճանաչվել։ Հարուցված քրեական գործի շրջանակներում ձերբակալվել է հինգ քաղաքացի, այդ թվում՝ Տարոն Մանուկյանը և Գոռ Սարգսյանը։ Արսեն Մարտոյանը ներգրավվել է որպես մեղադրյալ և նրա նկատմամբ որպես խափանման միջոց է ընտրվել կալանավորումը։ Քննիչը միջնորդություն է ներկայացրել նաև Գոռ Սարգսյանին և Տարոն Մանուկյանին կալանավորելու մասին։

Հեղինակ՝ Իզաբել Սահակյան

Աղբյուր` Փաստինֆո