Փաստ ինֆո

«Այն միջնորդությունը, որ մենք այսօր մեր իրավաբան Վահան Հովհաննիսյանի հետ ներկայացրինք Գլխավոր դատախազին, կարծում ենք, պետք է բավարարվի։ Նիկոլ Փաշինյանն անհապաղ պետք է ձերբակալվի, ՀՀ գլխավոր դատախազության շենքի մոտ լրագրողների հետ զրույցում ասել է 44 օրյա զոհված զինծառայող Մխիթար Գալեյանի հայրը` Գարիկ Գալեյանը։

Հիշեցնենք, որ այսօր Ֆրանսիայի հրապարակից երթ իրականացվեց դեպի ՀՀ Գլխավոր Դատախազության շենք, որտեղ ելույթներով հանդես եկան այնտեղ հավաքված 44 օրյա պատերազմում զոհված զինծառայողների ծնողները, ՀՀ ԱԺ «Հայաստան» դաշինքի պատգամավոր Արամ Վարդևանյանն ու նույն դաշինքի պատգամավոր Արթուր Ղազինյանը։ Բոլորի պահանջը նույնն էր՝ ուղղված ՀՀ գլխավոր Դատախազությանն՝ անմիջապես ձերբակալել ՀՀ վարչապետ աշխատող Նիկոլ Փաշինյանին։

Զոհվածի հայրը նկատում է՝ առավել իրատեսական սպասելիքներ ունի միայն գլխավոր դատախազից.«Կարծում եմ իրավապահ համակարգում միակ տղամարդը գլխավոր դատախազն է։ Մնացյալը՝ ԱԱԾ, Քննչական և այլն, ոչինչ են։ Երբ օրեր առաջ Արթուր Դավթյանը դուրս եկավ այստեղ՝ մեզ հետ զրուցելու, ասաց, որ մեր պահանջն արդար է։ Կարծում եմ՝ այս պահին էլ, որ միջնորդել ենք, որպեսզի Փաշինյանը ձերբակալվի, մեր արդար պահանջը կբավարարվի և այդ մարդը կձերբակալվի։ Արթուր Դավթյանը դեռ պահում է իր խոսքը»,- լրագրողների հետ ճեպազրույցի ժամանակ ասում է զոհված զինծառայողի հայրը։

Վերջինս նաև հավելել է՝ եթե Գլխավոր դատախազը կայացնի այդ որոշումը՝ ձերբակալել Փաշինյանին հարյուրավոր ծնողներ, ովքեր զավակներ են կորցրել 44 օրյա պատերազմի ընթացքում, կկանգնեն նրա կողքին։

Մանրամասները՝ տեսանյութում։

Աղբյուր` Փաստինֆո