Փաստ ինֆո

ԱԺ «Հայաստան» խմբակցության պատգամավոր Գեղամ Մանուկյանի որդու՝ Տարոն Մանուկյանի և ՀՅԴ ՀԵՄ ներկայացուցիչ Գոռ Սարգսյանի առնվազն ձերբակալությունը քաղաքական ենթատեքստ է կրում։ Այս մասին «Փաստինֆո»-ի հետ զրույցում ասաց Տարոն Մանուկյանի և Գոռ Սարգսյանի պաշտպան Աբգար Պողոսյանը։

«Զավեշտն այն է, որ անձինք ինքնակամ ներկայացել են քննչական բաժին, բայց ձերբակալման հիմքում վարույթն իրականացնող մարմինը դրել է խուսափելու հիմքը, պատճառաբանել, թե հնարավոր է խուսափեն, թաքնվեն վարույթն իրականացնող մարմնից՝ պատճառաբանելով, թե դեպքի վայրն են լքել։ Առնվազն այս մասով ծիծաղելի է, երբ անձն ինքնակամ ներկայանում է քննչական մարմին և նման հիմքով ձերբակալում են»,- նշեց պաշտպանը՝ հավելելով, որ ժամեր անց արդեն ձերբակալումը ոչ իրավաչափ ճանաչելու պահանջով բողոք կներկայացվի դատարան։

Ինչ վերաբերում է քրեական գործին, ապա փաստաբանը նշեց, որ գործն իրականում հանրային դաշտում հուզական է ներկայացվում, ոչ ոք բռնությունը չի խրախուսում՝ ոչ ինքը, ոչ իր վստահորդները, սակայն իրականությունն ամենևին այնպիսին չէ, ինչպիսին փորձում են ներկայացնել հանրությանը։ Մասնավորապես, տվյալ տարեց անձինք արդեն նախապես պատրաստված, ձվերով տոպրակով այնտեղ կանգնած են եղել, նախնական տեղեկություններով՝ տվյալ տարածքի բնակիչներ չեն։

«Բացի այն, որ ձվերով և քարերով խփել են, նաև հայհոյախառն արտահայտություններ են արել պարբերաբար՝ առանց դադարի, ամենավերջին ձևերով վիրավորել են երիտասարդներին, անգամ այն պահին, երբ երիտասարդները փորձել են հասկանալ, թե ինչ է կատարվում»,- նշեց փաստաբանը՝ հավելելով, որ տեսաձայնագրությունում երևում է, թե ինչպես է սկզբում երիտասարդներից մեկը փորձել հարցնել, թե որն է պատճառը։

Պողոսյանի փոխանցմամբ՝ անգամ իր վստահորդի շորերին կա ձվի հարվածի հետքեր, կա կոտրված մեքենա, ակնհայտ է, որ սադրանք է եղել։

«Իհարկե վատ է, որ տրվել են սադրանքին, բայց դա նախապես պլանավորված էր, ձվերով տոպրակով տարեց քաղաքացիները պատահաբար չէին անցնում։ Կրկնում եմ՝ բռնությունը չենք արդարացնում, բայց այն, ինչ եղել է՝ իշխանության կողմից մանրամասն պլանավորված սադրանք էր, որը, կարելի է ասել, իր պտուղները տվեց»,- ասաց Աբգար Պողոսյանը՝ հավելելով, որ այլ մանրամասների մասին կբարձրաձայնի ավելի ուշ։

Հիշեցնենք, որ մայիսի 8-ին ընդդիմադիր գործիչների նախաձեռնությամբ Գյումրիում հանրահավաք է եղել։ Նույն օրը Գյումրու Երևանյան խճուղում գտնվող հասարակական տրանսպորտի կանգառում միջադեպ-վիճաբանություն է տեղի ունեցել։ Մասնավորապես, կանգառում կանգնած տարեց տղամարդիկ՝ 74, 56, 72 և 84 տարեկան, հայհոյանքներ են հնչեցրել դաշնակցական երիտասարդների հասցեին, ձվեր նետել վերջիններիս ուղղությամբ, ինչից հետո վիճաբանություն է տեղի ունեցել։ Դեպքի առթիվ հարուցվել է քրեական գործ, տարեց տղամարդիկ տուժող են ճանաչվել։ Հարուցված քրեական գործի շրջանակներում ձերբակալվել են Տարոն Մանուկյանը և Գոռ Սարգսյանը, իսկ Արսեն Մարտոյանը ներգրավվել է որպես մեղադրյալ և նրա նկատմամբ կալանավորումը որպես խափանման միջոց ընտրելու մասին միջնորդություն կներկայացվի դատարան։

Հեղինակ՝ Իզաբել Սահակյան

Աղբյուր` Փաստինֆո