Փաստ ինֆո

Ծիծաղելի քրեական գործերը, որոնք հիմա հարուցվում են ակցիայի մասնակիցների նկատմամբ, ուղղակի նպատակ են հետապնդում՝ ակտիվ անհնազանդություն ցուցաբերող քաղաքացիներին ինչ-որ ձևով փակի տակ պահելու: Այս մասին «Փաստինֆո»-ի հետ զրույցում ասաց իրավաբան Ռոբերտ Հայրապետյանը:

Նշենք, որ այս օրերին ՔԿ-ն պարբերաբար հաղորդում է Երևանում և ՀՀ մարզերում իրականացվող խաղաղ ակցիաների առնչությամբ տռարբեր քրեական գործերի հարուցման, ձերբակալությունների մասին, ընդ որում, քրեական գործերը հարուցվում են ակցիաների մասնակիցների նկատմամբ, իսկ, օրինակ, ԱԱԾ ՊՊԾ պետի կողմից լրագրողների մասնագիտական գործունեությունը խոչընդոտելու, ոստիկանների կողմից քաղաքացիների նկատմամբ բռնություններ գործադրելու դեպքերի առթիվ հարուցված քրեական գործերի մասին առ այս պահը հայտնի չէ:

Ռոբերտ Հայրապետյանը հարուցված քրեական գործերը որակեց որպես ծիծաղելի:

«Մի դրվագ պատմեմ: Վարչական ձերբակալման ենթարկված չորս քաղաքացիների նկատմամբ ուզում էին անմիջապես հարուցել քրեական գործեր՝ վերջիններիս ձերբակալման համար, իբրև՝ փողոցում մեքենաների հետագա ընթացքն անվադողերով փակելը խուլիգանություն է, համապատասխան հաղորդումները ներկայացնելուց հետո, երբ նշեցինք, որ կարմիր բերետավորներն ակնհայտ բռնի ուժով են բերման ենթարկել, քրեական գործերն անմիջապես վերածվեցին վարչական ձերբակալման և 3 ժամը լրանալուց հետո ազատ արձակեցին: Եթե ոստիկանությունը, Նիկոլ Փաշինյանը, պետական այլ մարմիններ կարծում են, որ քրեական գործերով, կալանավորելով կամ ձերբակալելով կարող են կասեցնել շարժման ընթացքը, կամ հետագայում կապել շարժման ղեկավարների հետ, որպեսզի քրեական գործեր հարուցեն, ապա ցավում եմ իրենց համար, սա ոչ մի տեղ չտանող ճանապարհ է, քրեական գործերը փուչիկներ են ընդամենը»,- նշեց Հայրապետյանը՝ հավելելով, որ ձերբակալել են նաև Մանուել Մանուկյանին, միջնորդություն են ներկայացրել կալանավորելու մասին, թեև մեղադրանքին ծանոթ չէ, բայց կարող է ասել, որ հերթական ծիծաղաշարժ, հումորային քրեական գործն է լինելու:

Ինչ վերաբերում է ոստիկանության ծառայողների գործողություններին, իրավաբանը նշեց, որ բազմաթիվ տեսանյութեր կան տարածված, որտեղ երևում է, որ ակնհայտ ոչ իրավաչափ, բռնի գործողություններ են ծավալում, ոստիկանների գործողությունների վերաբերյալ համապատասխան հաղորդումներ են ներկայացվում: Վարչական ձերբակալման ենթարկված բոլոր ցուցարարները, որոնց նկատմամբ ոստիկանները բռնի ուժ են կիրառում, տվյալ ոստիկանների նկատմամբ հաղորդումներ են ներկայացվում, սակայն Հայրապետյանը մտահոգություն հայտնեց, որ որևէ ընթացք դրանք որպես այդպիսին չեն ստանում, որովհետև ինքը համենայն դեպս չի տեսել, որ ՔԿ-ն կամ գոնե ոստիկանությունը հայտարարություն տարածի՝ իրենց աշխատակիցների ոչ իրավաչափ գործողությունների վերաբերյալ:

Անդրադառնալով ՊՊԾ պետի կողմից լրագրողի մասնագիտական գործունեությանը խոչրընդոտելու դեպքին՝ Հայրապետյանը նախ ուշադրություն հրավիրեց այն հարցին, թե արդյոք ԱԱԾ ՊՊԾ-ն իր որ լիազորության շրջանակում է իրականացնում հասարակական կարգի պահպանություն: Մասնավորապես, ՊՊԾ-ն հանդիսանում է ԱԱԾ ստորաբաժանում և վերջինիս լիազորությունները թվարկված են վարչապետի որոշմամբ՝2015թ, այդտեղ հասարակական կարգի պահպանության լիազորություն առկա չէ:

«Անգամ ՊՊԾ պետի անօրինական, չեմ վախենա ասել՝ քրեաիրավական հատկանիշներ պարունակող արարքը լրագրողի նկատմամբ, ծանրացնելու է իրավիճակը, քանի որ ինքը նախ իրավունք չուներ այդտեղ գտնվելու, որովհետև Բաղրամյան-Պռոշյան հատվածում, համենայն դեպս, այդ խորությամբ, չկա որևէ ռազմավարական օբյեկտ, որտեղ էլ կարող էր գտնվել հատուկ պահպանության ենթակա անձ, որի կյանքին սպառնացող ենթադրյալ վտանգի դեպքում նրանք պետք է այնտեղ գտնվեին: Այդպես որ՝ ՊՊԾ-ն նախ պետռք է պարզաբանի, թե որ լիազորությունների շրջանակներում է ինքն այդտեղ գտնվել, հետո նաև ցուցմունքներով՝ փորձի մեկնաբանել, թե ինչ իրավասությամբ է լրագրողի մասնագիտական գործունեությանը խոչընդոտել»,- ընդգծեց Հայրապետյանը:

Հեղինակ՝ Իզաբել Սահակյան

Աղբյուր` Փաստինֆո