Փաստ ինֆո

«Նիկոլը խեղդվում է իր ամբողջ քաղաքական թիմով, խորտակվում է և շատ հաճախ բռնվելով սխալ տեղերից՝ հայտնվում է անախորժ վիճակների մեջ»,- ֆեյսբուքյան ուղիղ եթերում նման հայտարարությամբ է հանդես եկել ՀՀԿ փոխնախագահ Արմեն Աշոտյանը:

Անդրադառնալով ԱԽՔ Արմեն Գրիգորյանի նախօրեին հնչեցված հայտարարությանն առ այն, որ ոչ միայն Ադրբեջանն է հինգ առաջարկ ներկայացրել, այլ Հայաստանն ավելի շատ ՝ վեց առաջարկ է արել, որը չի առարկվել Ադրբեջանի և միջազգային հանրության կողմից:

«Հայաստանի անունից այս ոհմակն արել է արցախյան բանակցությունների, հայ-ադրբեջանական օրակարգի հետ կապված առաջարկություններ, որոնց մասին հայ ժողովուրդը տեղյակ չի: Այդ առաջարկությունները գաղտնի են պահվում Նիկոլի կողմից, ԱԳՆ-ի կողմից, ԱԽՔ-ի կողմից: Հայ ազգի մեջքի հետևում ընթանում է հերթական հակապետական գործընթացը»,- հայտարարել է նա՝ նկատելով, որ միջազգային կազմակերպության, դիվանագիտական ծառայության որևէ բարձրաստիճան պաշտոնյա, ներկայացուցիչ չի հայտարարել, որ առաջարակությունները միջազգային հանրության համար ընդունելի են, նույնը ՝ Ադրբեջանը:

«Երեկ ԱԽՔ-ը խոսում էր ընդդիմության որակի մասին՝ հայտարարելով, թե ընդդիմությունը մինչև հիմա քննարկում է ՝ Սերժ Սարգսյանը փաթեթայի՞ն, թե՞՝ փուլային լուծում էր բանակցում: Այս դիսկուրսը քաղաքական օրակարգ վերադարձրել է Նիկոլ Փաշինյանը: Եթե դու Նիկոլին ես համարում անմակարդակ, դա ճիշտ է»,- ուղիղ եթերում նշել է Աշոտյանը։

Նրա խոսքով՝ փաստաթղթերի փաթեթը հանրայնացնելը իշխանության պարտականությունն է, բայց այս իշխանությունը փաստաթղթերի ծայրն անգամ տեսնելուց սարսափում է:

«Հայաստանի Հանրապետությունը, այդ թվում՝ ապրիլյան պատերազմից հետո, բանակցում էր մի փաթեթ, որտեղ ամրագրված էր, որ Արցախի ժողովուրդն ունի ինքնորոշման իրավունք:  Իշխանության գլխավոր գերագույն ոչնչությունը 2020-ի հունվարին Կապանում տված ասուլիսի ժամանակ հեգնական տոնով հրապարակել է Սերժ Սարգսյանի թողած բանակցությունը՝ փաստելով վերոնշյալը՝ տարածքների վերադարձի դիմաց (5+2) 2 փուլով Արցախը ստանում է ինքնորոշման իրավունքի հնարավորություն: ԱԽՔ-ի հայտարարությունը, թե 2016-ից հետո անկախության թեման չի եղել՝ սուտ է: Այդ մասին խոսել է ՌԴ-ն, ամերիկացի նախկին համանախագահ Ջեյմս Ուորլիքը, խոսել է Ալիևը, երբ ասում էր, որ միջազգային հանրությունն իրեն պարտադրում է ճանաչել Ղարաբաղի ինքնորոշման իրավունքը: ՄԱԿ-ի Անվտանգության խորհրդի 93-ի բանաձևերի վրա հղում էին անում հայր և որդի Ալիևները, իսկ հիմա ՝ Ալիևի «հարճ» դարձած ՀՀ վարչապետը»,- հայտարարել է Արմեն Աշոտյանը:

Նա անբարոյականություն է գնահատել  44-օրյա պատերազմը, որում մենք պարտվել ենք, համեմատել քառօրյա պատերազմի հետ, որի ընթացքում հակառակորդը չի կարողացել հասնել իր նպատակին:

«Քառօրյա պատերազմի հաղթանակը կասկածի տակ են դնում Ալիևը, Նիկոլը ու իր մանկլավիկ «քածերը»:  Նիկոլ Փաշինյանը ինչ եկել է ղեկավարության, Արցախի հարցով ամեն ինչ պատմել է ղեկավարությանը: Սուտ է: Նոյեմբերի 9-ի կապիտուլյացիոն պայմանագիրը համաձայնեցրե՞լ եք արցախցիների հետ: Անգամ հայ ժողովրդի հետ չեք համաձայնեցրել:  Այսօրվա ստատուս քվոն, որ ուզում եք փոխել, ձեր ո՞ր մի տերն է ստիպում, ՌԴ խաղաղապահները 5 տարվա մանդատ ունեն, 3 տարի դեռ կա, ու՞ր եք շտապում»,- ասել է նա։

Նկատելով, որ ԱԽՔ-ը հայտարարել է, թե Հայաստանը ժողովրդավար երկիր է, անգամ նոյեմբերի 9-ի կապիտուլյացիայից հետո չեն սահմանափակվել հանավաքների անցկացումը՝ Աշոտյանը հիշեցրել է, որ  2021-ին Economist Intelligence Unit -ը հրապարակել է 2021 թվականի ժողովրդավարության ցուցիչը, որտեղ նշվում է, որ անգամ պատերազմի ավարտից հետո ռազմական դրությունը շարունակվեց և օգտագործվեց որպես առիթ հակակառավարական ցույցերը ցրելու և ընդդիմության ռաջնորդներին ձերբակալելու համար:

«Ամենաստոր բանն այն է, որ որտեղ իշխանությունը պատասխան չունի, ասում է ՝ ժողովուրդը մանդատ է տվել, ժողովուրդը մեզ ընտրել է: Հայ ժողովուրդ, իմացե՛ք, հերթական դավաճանական գործարքը, որ «եփվում» է մեր մեքջի հետևում, արվում է ձեր անունից: Հարգելի՛ ժողովուրդ, անգամ եթե Նիկոլին ընտրել եք, նրան դավաճանության մանդատ տվե՞լ եք: Իմացեք, որ այսօրվանից այդ դավաճանությունը գրվում է ձեր ճակատին»,- հայտարարել է Արմեն Աշոտյանը։

Աղբյուր` Փաստինֆո