Փաստ ինֆո

Համոզված եմ, որ հերթական կեղծիքն է՝ կազմակերպված Նիկոլ Փաշինյանի հանձնարարությամբ։ Այս մասին «Փաստինֆո»-ի հետ զրույցում ասաց «Հայրենիք» կուսակցության խորհրդի անդամ Արսեն Բաբայանը՝ անդրադառնալով ՀՀ քննչական կոմիտեի տարածած հաղորդագրությանը։

Հիշեցնենք, որ ՀՀ ՔԿ-ն հաղորդագրություն է տարածել, համաձայն որի՝ 2022թ. մայիսի 5-ին՝ համացանցում տարածվել էր հրապարակում և տեսագրություն, որում երկու անձիք հեռախոսազրույցի ընթացքում քննարկում են կազմակերպված հավաքներին մասնակցելու համար կազմակերպիչներից գումար ստանալու հարցը:

«Իրականացված միջոցառումների արդյունքում պարզվել է նշված անձանց ինքնությունը, ովքեր Արմավիրի մարզի՝ 1966 և 1967թթ. ծնված բնակիչներ են:

Տվյալներ են ստացվել այն մասին, որ քաղաքական ընդդիմության նախաձեռնությունների կազմակերպիչները, Երևանում իրականացվող հավաքներին մասնակցելու նպատակով, Արմավիրի մարզի հիշյալ բնակիչներից մեկին նյութապես շահագրգռել են, վերջինս էլ իր հերթին՝ նյութապես շահագրգռել է այլ անձանց:

Արմավիրի մարզի հիշյալ երկու բնակիչները ձերբակալվել են»,- հայտնել են ՔԿ-ից։

Արսեն Բաբայանը «Փաստինֆո»-ի հետ զրույցում համոզմունք հայտնեց, որ դա հերթական կեղծիքն է՝ կազմակերպված Նիկոլ Փաշինյանի հանձնարարությամբ:

«Ամեն դեպքում «Հայրենիք» կուսակցության որևէ անդամ ձերբակալված չէ, մեր կուսակցականների հետ կապված նույնիսկ այսպիսի շինծու մեղադրանքներ առկա չեն»,- ասաց նա:

Հարցին՝ արդյո՞ք այս քայլերով իշխանությունները փորձում են հող նախապատրաստել՝ ընդդիմության առաջնորդների հետագա ձերբակալությունների համար՝ Բաբայանը պատասխանեց. «Ամեն ինչ էլ հնարավոր է: Այս թուրքահպատակ իշխանությունից ամեն ստորություն սպասելի է»։

Աղբյուր` Փաստինֆո