Փաստ ինֆո

Աշխարհում հենց հիմա տեղի են ունենում կարևոր բաժանումներ, եթե Հայաստանը չունի նորմալ ղեկավար և չի մասնակցում այդ գործընթացին, ապա Հայաստան այլևս չի լինելու: Այս մասին «Փաստինֆո»-ի հետ զրույցում ասաց Պաշտպանության նախկին փոխնախարար Արտակ Զաքարյանը:

«Այսօրվա իշխանությունները իրենք էլ հայտարարել են, որ ի վիճակի չեն պաշտպանել հայ ժողովրդին, քանդել են անվտանգային համակարգը և հիմա էլ զբաղված են խաբեությամբ: Այս իշխանությունները պետք է հեռանան և այդ ճանապարհով արդեն կկարողանաք կառուցել իշխանության այն բովանդակությունը, որը պետության բոլոր ինստիտուտները կծառայեցնի երկրի բնականոն զարգացմանը »,-ասաց Զաքարյանը:

Ինչ վերաբերվում է ընդդիմության պայքարին՝ զրուցակիցն ասաց, որ պայքարն արդեն համաժողովրդական բնույթ է ստացել, Նիկոլ Փաշինյանի հրաժարականի պահանջին օրեցօր ավելի շատ քաղաքացիներ են միանում.

«Ես վստահ եմ , որ մի օր Երևանի հրապարակները լցված են լինելու մարդկանցով, որոնք և՛ աշխարհին, և՛ կապիտուլյանտներին ներկայացնելու են հայ ժողովրդի լինելության և անվտանգության բոլոր հարցերը»,-ասաց Զաքարյանը:

Հարցին՝ ինչո՞ւ ընդդիմությունը չի ներկայացնում ծրագիր՝ ինչպես է խնդիրները լուծելու իշխանության գալու դեպքում, Արտակ Զաքարյանն ասաց, որ ընդդիմության ծրագրի առաջին քայլը Նիկոլ Փաշինյանին հեռացնել է, հասարակությանը համախմբելը և հասարակության շրջանում հակաքարոզչությունները և պառակտումը վերացնելը,

«Արցախի կարգավիճակի հարցում պետք է խոսել աշխարհի հետ, Ռուսաստանի հետ պետք է պլանավորել Արցախի անվտանգության խնդիրները, պետք է բացառել պատերազմի որևէ հնարավորություն, սրանք պատերազմ են բերելու, որքան մնացին՝ պատերազմը մոտենալու է, հաջորդ իշխանությունը պարտավոր է պատերազմի վտանգները չեզոքացնել, վերականգնել խարխլված անվտանգային ռեսուրսները»,-ասաց Զաքարյանը:

Աղբյուր` Փաստինֆո