Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի պաշտպանները պահանջում են Աղվան Հովսեփյանի նկատմամբ ընտրված խափանման միջոց կալանավորումը փոխարինել գրավով։

Ինչպես արդեն տեղեկացրել ենք՝ Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, քննարկվում է Աղվան Հովսեփյանի նկատմամբ ընտրված խափանման միջոց կալանավորման փոփոխման հարցը։ Մեղադրանքի կողմը միջնորդել է անփոփոխ թողնել ընտրված խափանման միջոցը։ Հիշեցնենք, որ նա կալանքի տակ է արդեն 8 ամիս։

«Փաստինֆո»֊ի թղթակցի հաղորդմամբ՝ պաշտպանության կողմը միջնորդեց Հովսեփյանի նկատմամբ ընտրված խափանման միջոց կալանավորումը գրավով փոխարինելու մասին։ Փաստաբան Էրիկ Ալեքսանյանն ընդգծեց՝ գործում առկա տվյալները բավարար են՝ խափանման միջոցի փոփոխման համար։ Ընդ որում, նախաքննության ընթացքում Հովսեփյանին կալանավորելիս դատարանները որպես միակ հիմք մատնանշել են հնարավոր խոչընդոտման հավանականությունը, որում դրվել է Հովսեփյանի՝ նախկինում զբաղեցրած պաշտոնները, ունի հեղինակություն, մինչդեռ պաշտպանի գնահատմամբ, անձի բարձր հեղինակությունը չի կարող մեկնաբանվել ի վնաս անձի։ Ալեքսանյանն այդ առնչությամբ հարց բարձրացրեց՝ եթե վերջիններս հետագայում քրեական հետապնդման ենթարկվել և կալանքի հիմա կմատնանշվի որպես հիմք զբաղեցրած պաշտոնները, արդյո՞ք դա իրենց հաճելի կլիներ, իհարկե՝ ոչ։ Փաստաբանն արձանագրեց, որ քրեական գործում առկա չէ տվյալ, որով կհիմնավորվեր գործին խոչընդոտելու հավանականությունը։ Փաստաբանի խոսքով՝ Աղվան Հովսեփյանին կալանքի տակ պահելն ինքնանպատակ է, իսկ քրեական գործը կառուցված է բացառապես երկու անձի ամբիցիաների հիման վրա։ Պաշտպան Աննա Մանթաշյանն էլ արձանագրեց՝ հեղափոխությունից հետո Հովսեփյանը որևէ անձի նկատմամբ ազդեցություն գործադրել։ Փաստաբան Երեմ Սարգսյանն էլ նշեց, որ Աղվան Հովսեփյանի հարազատները պատրաստակամ են վճարել գրավի գումարը՝ մինչև 50 մլն ՀՀ դրամ, սակայն, եթե դատարանը գտնի, որ անհրաժեշտ է ավելի մեծ չափի գումար, ապա խնդրեց դա արձանագրել, կփորձեն վճարել։

Աղվան Հովսեփյանի կողմից հնարավոր խոչընդոտման հավանականությունը Արթուր Ղամբարյանը ծիծաղելի գնահատեց, նշեց՝ եթե խոչընդոտներ, մեղադրյալի կարգավիճակում չէր լինի։ Նրա խոսքով՝ Աղվան Հովսեփյանի նկատմամբ հետապնդումը, նրան կալանավորելը պայմանավորված է երկու թույլ, թունավորված անձի վրեժխնդրությամբ, որոնցից մեկը նստած է ՀՔԾ-ում, մյուսը՝ ԲԴԽ-ում, ու դա էլ կդրվի կալանավորման որոշման հիմքում։
Կողմերի դիրքորոշումը լսելուց հետո դատարանը հեռացել է խորհրդակցական սենյակ՝ որոշում կայացնելու։ Դատարանի որոշումը կհրապարակվի վաղը՝ առավոտյան ժամը 10։00֊ին։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո