Փաստ ինֆո

Սասուն Խաչատրյանի ղեկավարած կառույցը չէր կարող քննել ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի վերաբերյալ քրեական գործը։ Փաստաբան Երեմ Սարգսյանը լրագրողների հետ զրույցում նշեց, որ դատախազությունը պետք է գործը մեկ այլ՝ օբյեկտիվ մարմնի տար, թեև Հայաստանում դժվար կլիներ այդպիսին գտներ, սակայն այդ պարագայում առնվազն գոնե անձնական դաշտից դուրս կլիներ։

Ինչպես արդեն տեղեկացրել ենք՝ երեկ Երևանի ընդհանուր իրավասության դատարանում ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանը հետաքրքիր բացահայտումներ է արել, այդ թվում՝ ՀՔԾ նախկին պետ, այժմ՝ Հակակոռուպցիոն կոմիտեի նախագահ Սասուն Խաչատրյանի հետ հարաբերությունների մասին։ Մասնավորապես, Աղվան Հովսեփյանը հայտարարել է, որ Սասուն Խաչատրյանի հետ փաստացի ունեցել է ե՛ւ լավ, ՛եւ վատ հարաբերություններ, մասնավորապես Գլխավոր դատախազի պաշտոնում իր պաշտոնավարման ժամանակ Սասուն Խաչատրյանն ունեցել է առաջխաղացում, արժանացել պարգեւների, սակայն հետագայում հրաժարվել է նրան ընդունել ՀՀ քննչական կոմիտեում աշխատանքի՝ չնայած բազմաթիվ խնդրանքներին։ Նման պայմաններում Սասուն Խաչատրյանը պարտավոր էր ինքնաբացարկ հայտնել ու չիրականացնել նախաքննություն, քանի որ չէր կարող լինել օբյեկտիվ։

Լրագրողների հետ զրույցում փաստաբան Երեմ Սարգսյանից հետաքրքրվեցինք՝ այն հանգամանքը, որ գործը քննվել է հենց Սասուն Խաչատրյանի ղեկավարած կառույցը, արդյոք չի նշանակում, որ գործն ի սկզբանե տապալված է՝ փաստաբանը պատասխանեց՝ միանշանակ դա է նշանակում։ Նրա խոսքով՝ ցանկացած գործ, որը քննվում է, պետք է օբյեկտիվ տեսանկյունից մարմինը պետք է լինի անկախ, անկողմնակալ։

«Կարող են պատճառաբանել, որ քննիչն անձնապես կապ չունի, բայց պետք չէ կտրվել իրականությունից։ Ցանկացած քննիչ ենթարկվում է իր վերադասին, իսկ ՀՀ-ում՝ առավել ևս, անվերապահորեն է ենթարկվում վերադասին։ Այսինքն՝ ինքնուրույնության չնչին նշույլ անգամ չկա, իսկ եթե ենթարկվում է վերադասին, արդեն տարբերություն չկա՝ քննիչն է քննում, թե ղեկավարը։ Այս առումով դատախազությունն առնվազն պետք է այլ մարմնի տար, օբյեկտիվ մարմնի, որը, թեև ՀՀ-ում դժվար է այդպիսին գտնել, բայց առնվազն գոնե անձնական դաշտից դուրս կլիներ, կմնար պետական խնդիրը։ Պետք է միանշանակ այլ մարմին քններ»,- նշեց Սարգսյանը։

Շարունակելով ոչ պատշաճ սուբյեկտի կողմից գործի քննության հանգամանքին՝ փաստաբանը ուշադրություն հրավիրեց նաև գործը դատարանում՝ դատավոր Մնացական Մարտիրոսյանի կողմից քննելու հանգամանքին։ Փաստաբանը հիշեցրեց, որ դատավորին ինքնաբացարկի միջնորդություն էին ներկայացրել՝ նշելով, որ դատարանի նախագահը դիտավորյալ է մակագրել գործը Մարտիրոսյանին, որպեսզի հետագայում անակնկալներ չլինեն։ Փաստաբանն ընդգծեց՝ ինչ որոշում էլ կայացվի՝ անարդար է լինելու։

Մանրամասները՝ տեսանյութում

Աղբյուր` Փաստինֆո