Փաստ ինֆո

Կադրային հարցերում Արայիկ Հարությունյանն ինքնուրույն որոշումներ կայացնել չի կարողանում․ անզեն աչքով էլ տեսանելի է, որ Հայաստանից ներազդում են նրա որոշումների վրա։ Անդրադառնալով մեղադրյալի կարգավիճակում գտնվող Արցախի տարածքային կառավարման և ենթակառուցվածքների նախարար Հայկ Խանումյանի՝ առայսօր պաշտոնավարելու փաստին՝ «Փաստինֆո»-ի հետ զրույցում նման տեսակետ հայտնեց Արցախի ԱԺ «Արդարություն» խմբակցության ղեկավար Դավիթ Գալստյանը։

«Համոզված եմ, որ Արայիկ Հարությունյանը հատկապես Հայկ Խանումյանին առնչվող հարցում ինքնուրույն որևէ որոշում չի կարող կայացնել։ Եթե Հայաստանից նրա վրա ճնշում չգործադրվեր, ապա վաղուց Խանումյանին ազատած կլիներ նախարարի պաշտոնից։ 1-2 ամիս առաջ նախագահի հետ մեր խմբակցության հետ ունեցած հանդիպմանը երբ հարց բարձրացրեցինք, թե այդ ինչպես է ստացվում, որ յուրացումներ են բացահայտվում նախարարությունում, բայց նախարարը շարունակում է պաշտոնավարել, ինքն ասաց, որ իրավապահ մարմինների գնահատականին է սպասում, որից հետո իր քայլերը կտեսնենք։ Իրավապահ մարմիններն արդեն մեղադրանք առաջադրել են Խանումյանին, բայց տեսնում ենք նախագահի անգործությունը»,-ասաց Գալստյանը։

Արցախցի պատգամավորի համոզմամբ՝ նման գործելաոճն անընդունելի է ոչ միայն Արցախի քաղաքական դաշտի համար, այլև՝ հասարակության համար։ Ասում է՝ պաշտոնյան, ում մեղադրանք է առաջադրվել, անհապաղ պետք է պաշտոնազրկվի։

«Ապրիլի 28-ին, երբ գլխավոր դատախազն ԱԺ-ում հաշվետվություն էր ներկայացնում, ինքս հարցրեցի՝ ճի՞շտ եմ հասկացել, որ ունենք կառավարության անդամ՝ մեղադրյալի կարգավիճակում, պատասխանեց՝ այո։ Փաստորեն, դա ևս վկայում է այն մասին, որ կադրային քաղաքականության հարցում Արայիկ Հարությունյանն ինքնուրույն չի գործում»,-նշեց Գալստյանը։

Հաշվի առնելով այն, որ Խանումյանի հարցում ՀՀ ներկա իշխանությունները մեծապես ազդում են Արցախի նախագահի որոշումների վրա՝ Գալստյանը չբացառեց նրան մեկ այլ պաշտոնի տեղափոխելու հնարավորությունը։

Նշենք, որ «Հրապարակ» թերթի տեղեկություններով՝ մոտ օրերս Արայիկ Հարությունյանը Խանումյանին ազատելու է նախարարի պաշտոնից և նշանակելու է նախագահի աշխատակազմի ղեկավար։

Աղբյուր` Փաստինֆո