Փաստ ինֆո

Դատավորին կպատժեին, եթե որոշեր Աղվան Հովսեփյանին ազատ արձակել, բայց եթե որեւէ դատավոր մտածում է, որ իրեն չպատժելու համար կարելի է մեկ ուրիշին ապօրինի կալանքի տակ պահել, ապա այստեղ լուրջ ընտրության հարց կա՝ աշխատե՞լ դատավոր, թե՝ ոչ, աշխատելն ո՞ւմ է պետք։ Այս մասին լրագրողների հետ զրույցում հայտնեց փաստաբան Երեմ Սարգսյանը։ 

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, անփոփոխ է թողել Աղվան Հովսեփյանի նկատմամբ որպես ընտրված խափանման միջոց կալանավորումը։

Փաստաբան Երեմ Սարգսյանը լրագրողների հետ զրույցում արձանագրեց` ակնհայտ է, որ Մնացական Մարտիրոսյանը մնաց Մնացական Մարտիրոսյան, ինչպես բոլոր գործերով տեղի է ունենում, որոշման մեջ գրելու է այն շաբլոն միտքը, որոնք միշտ կիրառում են։

«Այսօր մենք գործ ունեցանք չարդարադատության հետ, ինչն իրականացվեց Մնացական Մարտիրոսյանի միջոցով։ Օբյեկտիվ դիտորդների բոլոր արձագանքները խոսում են այն մասին, որ ոնց կարող էր ազատ չարձակվել, բայց երբ հասկանում ես, թե ով է դատավորը եւ գործով ինչ է տեղի ունենում, հասկանալի է, որ նման բան հնարավոր էր»,- նշեց փաստաբանը։

Դատարանի որոշման դեմ պաշտպանները վերաքննիչ բողոք կներկայացնեն, թեև փաստաբանը նշեց, որ Վերաքննիչ դատարանից մեծ հաշվով ակնկալիքներ չունեն, քանի որ կազմը, որը քննում են կալանքները՝ կրկին հատուկ ընտրված են, սակայն դա չի խանգարում բողոքները ներկայացնելու համար, քանի որ նպատակ են հետապնդում՝ ներպետական ատյանները սպառելու և ՄԻԵԴ դիմելու համար։

Աղբյուր` Փաստինֆո