Փաստ ինֆո

Խորհրդարանում Կառավարության հետ հարցուպատասխանի ժամանակ իրավիճակը լարվեց:

Նիկոլ Փաշինյանը ընդդիմադիրներին մեղադրեց «Ղարաբաղն Ադրբեջանի կազմում ճանաչելու մեջ»:
Նա, դիմելով ընդդիմադիր պատգամավոր Արմեն Ռուստամյանին, ասաց.

«Խոսում եք Արցախի նշաձողն իջեցնելու մասին՝ ուզում եմ հիշեցնել ձեզ, մի անգամ այս դահլիճում մակերեսային երկխոսություն իրար հետ ունեցել ենք, ես ուզում եմ արձանագրել, որ այն պահին, նաև ձեր իշխանության եղած ժամանակ, ՀՀ-ն ընդունել է Մադրիդյան սկզբունքները՝ որպես բանակցությունների սկիզբ, այդ պահից դուք ճանաչել եք Ղարաբաղն Ադրբեջանի կազմում»,-հայտարարեց Փաշինյանը:

Արձագանքելով Փաշինյանին՝ Արմեն Ռուստամյանն ասաց, որ Փաշինյանն ի սկզբանե չի տիրապետել Արցախյան հարցով բանակցություններին.

«Եթե Ձեզ թվում է, թե նախկինների վրա մեղքեր բարդելով՝ կարող եք արդարացնել այն ձախողումները, որ դուք եք բերել այս երկրի գլխին, չարաչար սխալվում եք: Ինչ կապ ունի՝ ով ինչ է արել, դուք եք եղել վարչապետ և պարտավոր էիք այդ կամքն իրացնել: Դուք հայտարարել եք, որ անգամ տեսական հնարավորություն չեք տեսնում՝ Արցախը Ադրբեջանը կազմից հանելու, բա եթե դուք այդ տեսակետին եք, մնում եք վարչապետ, որ ի՞նչ անեք, որ թողեք Արցախն Ադրբեջանի կազմում»,-հայտարարեց Ռուստամյանը:

Փաշինյանը հայտարարեց, թե իրեն պետք է ուշադիր լսեն, քանի որ կարևոր բացահայտում ունի անելու, ինչից հետո իրավիճակն ԱԺ-ում լարվեց:

Ընդդիմադիր պատգամավորները «Նիկո՛լ, դավաճան» վանկարկումներով լքեցին նիստերի դահլիճը:
Փաշինայնն էլ արձագանքեց՝

«Ախ, չէիք ուզում լսել, բա էդ ասեք, ոնց միշտ փախել եք, այ էդպես միշտ փախնելու եք»,-ասաց Նիկոլ Փաշինյանը, իսկ ՔՊ-ական պատգամավորներն էլ Փաշինյանի խոսքից հետո սկսեցին ծափահարել նրան և բղավել «Նիկոլ վարչապետ»:

Աղբյուր` Փաստինֆո