Փաստ ինֆո

ՀՀ գլխավոր դատախազությունը փաստել է, որ Հակակոռուպցիոն կոմիտեն անգործություն է ցուցաբերել Մովսես Հակոբյանի հայտարարությունների հիման վրա հարուցված քրեական գործով ու այն ուղարկել ՀՀ քննչական կոմիտե՝ հետագա քննության։ Այս մասին «Փաստինֆո»-ի հետ զրույցում հայտնեց փաստաբան Վահան Հովհաննիսյանը։ 

Ինչպես արդեն տեղեկացրել ենք՝ զոհված զինծառայողների ծնողները ՀՀ գլխավոր դատախազությունից պահանջում էին քրեական գործով իրենց տուժողների իրավահաջորդ ճանաչել, ինչը բավարարվել է և դատախազը ցուցում էր տվել քննիչին՝ ծնողներին տուժողների իրավահաջորդ ճանաչելու վերաբերյալ, սակայն քննիչը ձեռնպահ էր մնացել այն կատարելուց։ Մյուս պահանջը, որը ներկայացվել էր ծնողների կողմից, վերաբերում էր Նիկոլ Փաշինյանին քրեական գործով որպես մեղադրյալ ներգրավելուն, որի լուծումը Հակակոռուպցիոն կոմիտեի քննիչը հետաձգել է։

Փաստաբան Վահան Հովհաննիսյանը «Փաստինֆո»-ի հետ զրույցում ասաց, որ, թեև վաղուց արդեն մամուլում շրջանառվում են տեղեկություններ ՀՀ գլխավոր դատախազության և ՀՀ հակակոռուպցիոն կոմիտեի միջև առաջացած կոնֆլիկտի, միջգերատեսչական տարաձայնությունների մասին, սակայն առավել ակնառու այդ երկու կառույցների միջև առկա խոր անդունդը տեսանելի դարձավ զոհված զինծառայողների ծնողների ներկայացրած բողոքների վերաբերյալ գործով։

«Դեռևս 26․04․2022թ դատախազը ցուցում էր տվել զոհված զինծառայողների ծնողներին դատավարական կարգավիճակ տալու և այդ կապակցությամբ քննչական և դատավարական գործողություններ կատարելու համար։ Ընդ որում, անձին դատավարական կարգավիճակ շնորհելու համար ՀՀ քրեական դատավարությունը սահմանում է եռօրյա ժամկետ։ ՀՀ քրեական դատավարության օրենսգրքի 55-րդ հոդվածի համաձայն ․ «Քննիչը պարտավոր է կատարել դատախազի օրինական ցուցումները»»,- նշեց Հովհաննիսյանը՝ ընդգծելով, որ յուրաքանչյուր դեպքում, քննիչը ոչ միայն չունի որևէ իրավասություն չկատարելու դատախազի ցուցումը , եթե դրա վերաբերյալ չի ներկայացվել առարկություն, դրա չկատարումը ոչ միայն անգործություն է, այլև՝ իր մեջ առերևույթ հանցագործության տարրեր է պարունակում։

Փաստաբան Վահան Հովհաննիսյանն ընդգծեց, որ սույն քրեական գործով ՀՀ հակակոռուպցիոն կոմիտեի քննիչը, խախտելով ՀՀ քրեական դատավարության օրենսգրքի իմպերատիվ պահանջները, առանց որևէ իրավական հիմնավորման չի կատարել դատախազի ցուցումը և անձանց չի տվել համապատասխան դատավարական կարգավիճակ։ Արդյունքում, զոհված զինծառայողներին տրվել է տուժողի դատավարական կարգավիճակ՝ մայիսի 3-ին ՀՀ գլխավոր դատախազության դատախազի որոշմամբ, իսկ ՀՀ հակակոռուպցիոն կոմիտեի վարույթից վերցվել է քրեական գործը և հետագա քննությունը հանձնարարվել ՀՀ քննչական կոմիտեին։

Հովհաննիսյանը նշեց, որ վարույթը փոխելու փաստաթղթի բովանդակությանը ծանոթ չէ, բայց ողջամտորեն ենթադրում է, որ հիմքը հանդիսացել է ՀԿԿ-ի անգործությունը։

«Հանուն արդարության պետք է ասեմ, որ այս գործով դատախազությունը պատշաճ կատարել է իր պարտականությունները, չգիտեմ դա զոհվածների ծնողների հետ է կապված, թե միջգերատեսչական կոնֆլիկտի»,- արձանագրեց Հովհաննիսյանը։

Ինչ վերաբերում է Նիկոլ Փաշինյանին որպես մեղադրյալ ներգրավելու մասին միջնորդության լուծումը հետաձգելու ՀԿԿ քննիչի որոշմանը և հարցին՝ արդյոք ՔԿ-ում միջնորդությունը կարող է քննության առարկա դարձվել, փաստաբանը նշեց, որ միջնորդությունը պետք է քննության առարկա դարձվի, միայն մի բան կարող է ասել՝ ավելի վատ չի կարող լինել քան ՀԿԿ-ում էր, դրանից վատ չի լինում։

Հեղինակ՝ Իզաբել Սահակյան

Աղբյուր` Փաստինֆո