Փաստ ինֆո

Իշխանությունների սրտի դատավորների մեջ Ձեր անունը ևս նշվում է։ Այս մասին Աղվան Հովսեփյանի գործով դատական նիստի ընթացքում հայտարարեց փաստաբան Էրիկ Ալեքսանյանը՝ դիմելով նախագահող դատավոր Մնացական Մարտիրոսյանին։

Նշենք, որ դատարանում այս պահին քննարկվում է նախագահող դատավոր Մնացական Մարտիրոսյանին ինքնաբացարկ հայտնելու միջնորդությունը։ Պաշտպանները հայտարարել են, որ չի ապահովվել Աղվան Հովսեփյանի իրավունքների, օրինական դատարանի հիման վրա արդար դատաքննության իրավունքի պահպանումը։ Խնդիրն այն է, որ քրեական գործի մակագրման ընթացքում չի պահպանվել օրենքով սահմանված կարգը, դատարանի նախագահը քրեական գործը մակագրել է դատավոր Մնացական Մարտիրոսյանին, թեև գործերի բաշխման էլեկտրոնային մակագրման համակարգի առգրավվումն ԱԱԾ-ի կողմից չի կարող համարվել անհաղթահարելի ուժ, ընդ որում, մակագրման օրերին արդեն իսկ տեղեկացվել էր, որ մակագրման համակարգի բանալիները գտնվում են դատական դեպարտամենտում։ Փաստաբան Երեմ Սարգսյանը նշեց, որ Մարտիրոսյանը կատարում է դատարանի նախագահի հրահանգը։ Սարգսյանը փաստեց, որ անկախ, անաչառ դատավորների համբավ ունեցող դատավորների մոտ վերջին շրջանում նման գործեր չեն լինում, նրանց այժմ մակագրվում են ծեծի, մանր գողության գործեր, մինչդեռ, բոլորին այժմ հայտնի է, որ կալանավորման միջնորդությունները մակագրվում են Դավիթ Արղամանյանին, իսկ եթե գործը դատարանում է, ապա այդ գործերը քննում են կամ Մնացական Մարտիրոսյանը կամ մի քանի այլ դատավորներ։ Փաստաբանը հիշեցրեց նաև, որ անկախ դատավորների նկատմամբ իրականացվող ճնշումները, գաղտնալսումները, դատարանների մուտքերն ու ելքերը շրջափակելու դեպքերը և այլն, միևնույն ժամանակ, փաստաբանը հիշատակեց նախագահողի անձի շուրջ կասկած առաջացնող մամուլում հրապարակված փաստերն առ այն, որ վերջինս ունի քաղաքական իշխանության պատվերներ կատարող դատավորի համբավ։ Մինչդեռ, յուրաքանչյուր անձ իրավունք ունի, որ իր վերաբերյալ քրեական գործը քննվի օրենքի հիման վրա ստեղծված՝ անաչառ, անկողմնակալ դատարանի կողմից, հակառակ դեպքում, ի սկզբանե անարդար է դարձվում գործի քննությունը։

Փաստաբան Էրիկ Ալեքսանյանն էլ հիշեցրեց դատավոր Բորիս Բախշիյանի կալանավորման դեպքը, երբ դատավորը կալանավորվել էր՝ դատական նիստերին չներկայացող ամբաստանյալին կալանավորելու համար, ինչը ճիշտ որոշում էր, սակայն այս իշխանությունների սրտով չէր։ Ալեքսանյանն արձանագրեց, որ այն ինչ տեղի ունեցավ Բախշիյանի շուրջ, խժռեց իրավական համակարգը, հետևաբար, հարց է առաջանում՝ արդյոք դատավոր Մարտիրոսյանը կկարողանա որոշում կայացնել, որը չի լինի այս իշխանությունների սրտով։ Փաստաբանը նշեց, որ բոլոր ստանդարտից դուրս գործերով է այս հարցն ուղղում, իսկ Հովսեփյանի քրեական գործը նույնպես ստանդարտից դուրս է։ Նրա խոսքով՝ Աղվան Հովսեփյանի վերաբերյալ քրեական գործը հարուցվել է որոշ անձանց ամբիցիաների, վրեժխնդրության հիման վրա։

Ալեքսանյանն ընդգծեց, որ դատավոր Բորիս Բախշիյանը կալանավորվել է իր դատական ակտի համար, որը հաճո չի եղել այս իշխանություններին ու պարզ տրամաբանությունը հուշում է, որ Աղվան Հովսեփյանի խափանման միջոցի փոփոխման վերաբերյալ որոշումը ևս չի կարող այս իշխանություններին հաճո լինել։ Պաշտպան Աննա Մանթաշյանը միացավ միջնորդությանը։
Հայտարարությամբ հանդես եկավ նաև Աղվան Հովսեփյանը՝ նշելով, որ ութ ամիս լռել է, մանրամասն խոսելու է, երբ կալանքի հարցը քննարկվի, ունի ասելիքներ, որոնք նույնիսկ իր փաստաբանը չգիտի։

Մեղադրող դատախազներն առարկեցին միջնորդության դեմ՝ նշելով, որ միջնորդությունը ենթակա է մերժման։

Կողմերի դիրքորոշումը լսելուց հետո դատարանը հեռացավ խորհրդակցական սենյակ՝ որոշում կայացնելու։ Դատարանի որոշումը կհրապարակվի ժամը 18։30-ին։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո