Փաստ ինֆո

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, մեկնարկել է ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի և Վրեժ Մարկոսյանի գործով առաջին դատական նիստը։

«Փաստինֆո»-ի թղթակցի հաղորդմամբ՝ մինչ Աղվան Հովսեփյանի խափանման միջոցի հարցի քննությանն անցնելը պաշտպանության կողմը բարձրացրեց Մնացական Մարտիրոսյանի նախագահությամբ՝ օրինական դատարան լինել-չլինելու հարցը։ Մասնավորապես, պաշտպանության կողմը բարձրացրեց հարցեր՝ կապված մակագրման ընթացքում օրենքով սահմանված կարգի պահպանման վերաբերյալ։ Երեմ Սարգսյանը միջնորդեց դատարանին՝ դիմել Երևանի ընդհանուր իրավասության դատարանի նախագահ Արթուր Մկրտչյանին՝ պարզելու, թե արդյոք մակագրման ընթացքում պահպանվել է օրենքով սահմանված կարգը, թե ոչ, սակայն նախագահող դատավորը միջնորդությունը թողեց առանց քննության՝ նշելով, թե իբրև միջնորդությունը ժամանակավրեպ է; Պաշտպանն էլ հակադարձեց՝ դատարանը պետք է քննի խափանման միջոցի հարցը, տպավորություն է, թե դատարանը ցանկանում է արագ անցնել այդ հարցի քննությանը։ Դատարանի գործողություններից դժգոհություն հայտնեցին դատարանի դահլիճում գտնվողների շրջանում, որոնք դատարան էին եկել՝ հայտնելու իրենց աջակցությունը Աղվան Հովսեփյանին։ Վերջիններս հայտարարեցին, որ արդարադատություն չկա, ապա՝ լքեցին դատական նիստերի դահլիճը։ Պաշտպանները շարունակեցին հարցեր ուղղել՝ ինչու դատավորն ինքը չի փորձել պարզել, թե ինչու է գործն իրեն մակագրվել դատարանի նախագահի կողմից, եթե գործի մակագրման պահին արդեն իսկ էլեկտրոնային համակարգը կարող էր արդեն վերագործարկվել։ Մնացական Մարտիրոսյանը նշեց, որ գտնում է՝ իրեն գործը մակագրվել է պատշաճ կարգով։ Հարցադրումներին ի պատասխան, դատարանը, ըստ էության չփարատեց կասկածները՝ կողմնակալության, կանխակալության վերաբերյալ և ըստ այդմ պաշտպանության կողմը միջնորդություն ներկայացրեց՝ Մնացական Մարտիրոսյանին ինքնաբացարկ հայտնելու մասին։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո