Փաստ ինֆո

44-օրյա պատերազմի ընթացքում զոհված տղաների մի խումբ ծնողներ կրկին գլխավոր դատախազության շենքի առաջ են և սպասում են գլխավոր դատախազի պատասխանին։

«Գլխավոր դատախազը հինգ օր առաջ խոստացել էր մեզ պատասխան տալ, թե ինչ են ձեռնարկելու Նիկոլ Փաշինյանի և 44-օրյայի մյուս մեղավորների հանդեպ գործ հարուցելու ու պատասխանատվության կանչելու ուղղությամբ։ Հինգ օրն արդեն լրացել է և գլխավոր դատախազից պահանջում ենք՝ իջնել ու ասել, թե ինչ են արել այս ընթացքում»,-Դատախազության դիմաց հայտարարեց 44-օրյայում զոհված Մենուա Հովհաննիսյանի մայրը՝ Կարին Տոնոյանը։

Տիկին Տոնոյանը նաև շեշտեց, որ այսուհետ որևէ ծնող չի կարող հանգիստ նստել, քանի դեռ մեղավորները բացահայտված չեն և համապատասխան պատիժը չեն կրել։

Մեղավորներին պատժելու պահանջով ծնողները ոտքի են կանգնել հատկապես այն բանից հետո, երբ Նիկոլ ՓաշինյաննԱԺ ամբիոնից հայտարարեց, թե պատերազմի ելքը նույնն էր լինելու, ուղղակի առանց զոհերի։ Կարին Տոնոյանի համոզմամբ՝ դա ինքնախոստովանություն էր, որ ինքն է մեղավոր 5000 զոհերի համար։

«Եթե Նիկոլ Փաշինյանը մեղավոր չէ,ապա ինչի՞ց է վախենում։ Թող գա և հարցաքննվի։Մեր պահանջը մեկն է․ մենք զավակ ենք կորցրել և պահանջում ենք մեղավորներին կանգնեցնել հանրության և մեր դատի առաջ։ Որևէ մեկը չի կարող պատկերացնել, թե ինչ է զգում զոհվածի ծնողը, երբ որևէ մեղավոր դեռ չի պատժվել»,-ասաց տիկին Տոնոյանը։

Ծնողները պատրաստվում են նաև միջնորդություններ ներկայացնել դատախազություն՝ իրենց տուժող կողմ ճանաչելու համար։
«4 տարի է՝ միայն մեղադրվում են տարաբնույթ հանցանքներում, բայց ոչ ոք չի պատժվում։ Այս մեկը, սակայն, համահունչ չէ մյուսներին։ Մենք գիտենք, որ տեղի է ունեցել պետական դավաճանություն և պահանջում ենք գործ հարուցել, որ բացահատել մեղավորներին»,-նշեց Կարին Տոնոյանը և վստահեցրեց՝ ծնողները չեն նահանջելու, հասնելու են նրան, որ բոլոր մեղավորները կրեն իրենց պատիժը։

Աղբյուր` Փաստինֆո