Փաստ ինֆո

Մուլտիպլիկատոր, «Կիլմդիմ» հայտնի մուլտշարքի հեղինակ Դավիթ Սահակյանցն այս օրերին Ֆրանսիայի հրապարակում է լինում։

«Փաստինֆո» -ի հետ զրույցում մուլտիպլիկատորն ասում է՝ իր համար Ֆրանսիայի հրապարակը, պայմանականորեն ասված, սկսվել է դեռևս չորս տարի առաջ՝ երբ սրանք եկան իշխանության. «Մտավախություններս, ցավոք սրտի, ամբողջովին իրականացան։ Դեռևս այն ժամանակվանից, իրենց գալու այդ վտանգը զգում էի։ Ինչպես նաև՝ հաշվի առնելով այն իրողությունները, որ կատարվում են նման հեղաշրջումների դեպքում, նամանավանդ, կոնֆլիկտային պայմաններում գտնվող երկրների համար, ես պարզապես զգում էի, որ այդ ամենը բերելու է նրան, այն ինչ այսօր արդեն կատարվել է։ Ցավոք սրտի, ես ճիշտ դուրս եկա։ Հետևաբար, իմ այցելելը այստեղ՝ Ֆրանսիայի հրապարակ, շատ բանական է՝ առաջին իսկ օրվանից պայքարել եմ այդ մարդու դեմ»։

Դավիթ Սահակյանցը հավելում է՝ եթե ավելի անկեղծանա, այս օրերին շատ ոգևորված է, ուրախ է, որ այսօր օրը եկավ և տեսնելով, թե ինչ է կատարվում ոչ միայն Երևանում, այլ նաև մարզերում, բուհերում և մարդկանց գիտակցության մեջ, միայն ավելի ու ավելի է ոգեշնչվում, զգում է, որ մաս է դառնում համահայկական շարժմանը, որտեղ պայքարի են դուրս եկել Հայրենիքի առաջ ծառացած օրհասական խնդիրներով մտահոգ հազարավոր մարդիկ։ Հույս ունեմ, որ սա ընդդիմության վերջին և վճռորոշ հարված է լինելու հակահայ իշխանությանը, ասում է մուլտիպլիկատորը։

Առավել խնդրահարույց հարցն, այս պահի դրությամբ, մուլտիպլիկատորը համարում է դեմարկացիայի խնդիրը, որ ծառացել է մեր Հայրենիքի առջև .«Տեսնելով, որ այս մարդիկ, ընդհանրապես, շահագրգռված չեն ի շահ Հայաստանի որևէ որոշում ընդունելու, հասկանում ես, որ մենք իրապես վճռորոշ խնդիրների առաջ ենք կանգնել։ Մյուս կողմից՝ ժամանակը ցույց է տալիս, որ այն քարտեզները, որոնք դեմ է տալիս Ալիևը, ամբողջովին բավարարում է այս իշխանություններին։ Այս իշխանությունն այլևս որևէ շանս չունի՝ մնալու իշխանության ղեկին։ Ինձ մտահոգում է նաև այն, որ Չավուշօղլուն հայտարարում է, թե մենք դեռ պետք է պարզենք Հայաստանի և Թուրքիայի քարտեզների էությունը։ Ի՞նչ է սա նշանակում…Այս ամենն, իհարկե, առաջնային մտահոգիչ խնդիրներն են, որ ինձ բերել են հրապարակ»,- ասում է Սահակյանցը։

Նկատառմանը՝ ի՞նչ կոչ կանի մուլտիպլիկատորը իր կոլեգաներին՝ այն արվեստագետներին և ստեղծագործողներին, որոնք, այս կամ այն պատճառով Ֆրանսիայի հրապարակում չեն, Դավիթ Սահակյանցը պատասխանում է՝ եթե Արցախի դրոշն ու իրենց իսկ սեփական սիրտը նրանց ոչ մի կոչ չի արել, ապա իր կոչն այլևս անիմաստ է լինելու։

Աղբյուր` Փաստինֆո