Փաստ ինֆո

«Ոստիկանական ուժերի ցուցաբերած առանձնակի դաժանությունը բացատրվում է նրանով, որ նրանք իրականացնում են թուրք - ադրբեջանական ցեղասպանական ղեկավարության հրամանը, որովհետև այն, ինչ տեղի է ունենում այսօր փողոցներում, չի կարելի մեկնաբանել միայն նրանով, թե նրանք, ուղղակի, անօրինական հրաման են կատարում»,- «Փաստինֆո» լրատվականի հետ զրույցում ասում է Հայաստանի Մարդու Իրավունքների առաջին պաշտպան Լարիսա Ալավերդյանը։

«Այն, կներեք, ոգևորությունն ու դաժանությունը, որով գործում են ոստիկանական ուժերն այս օրերին, խոսում է այն մասին, որ այդ անձինք պատկանում են այն մարդկանց թվին, որոնց մասին ես ասել եմ՝ Հայաստանում գոյություն ունեն ոչ պակաս, քան 100 հազար մարդ, որոնք ունեն թուրք - ադրբեջանական ցեղասպանական քաղաքական կողմնորոշում։ Սա շատ կարևոր է հասկանալ։ Ժամանակին մարդիկ պետք է ընթերցեին ու ծանոթանային այն ոգևորությանը, որով ադրբեջանում սպասում էին այս իշխանության գալուն, որն, ի դեպ, խաբեությամբ զավթեց իշխանությունը Հայաստանում, իրականացնելու համար՝ ցեղասպանական ուղղակի գործողություններ, ինչին էլ մենք այսօր ականատես ենք լինում»,- ասում է Լարիսա Ալավերդյանը։

Այն, ինչ այսօր ոստիկանական ուժերը կատարում են Երևանի փողոցներում, շարունակությունն է այն հազարավոր երիտասարդների սպանության, որոնց ուղարկում էին մեռնելու Արցախում, իսկ այնուհետև, ԱԺ ամբիոններից խոստովանում էին, որ կարող էին հենց այնպես էլ հանձնել հողերն՝ առանց այդ զոհերի, արդյունքը, միևնույն է՝ նույնն էր լինելու, ասում է Հայաստանի Մարդու Իրավունքների առաջին պաշտպանը և հավելում. «Այսինքն, խոստովանում են, որ նպատակադրումը եղել է ոչ թե պաշտպանել երկիրը, այլ, պարզապես, հանձնել հողերը, բայց անել դա առանձնակի դաժանությամբ՝ հազարավոր զոհերի գնով։ Ճիշտ նույն սցենարը հիմա մենք տեսնում ենք, արդեն, Երևանի փողոցներում՝ ոստիկանների առանձնահատուկ դաժանությունը բացատրվում է նրանով, որ այս իշխանությունները հանդես են գալիս որպես թուրք – ադրբեջանական ցեղասպանական ծրագրի իրականացնողներ, այս անգամ, արդեն, ոստիկանների ձեռքով»,- ասում է լարիսա Ալավերդյանը։

Աղբյուր` Փաստինֆո