Փաստ ինֆո

Կա վճռական տրամադրված հայրենասեր հայրենակիցների մի հոծ խումբ, որոնք պատրաստ են իսկապես մեր երկիրը փրկել թուրքահպատակ իշխանություններից։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի կրտսեր որդին՝ Լևոն Քոչարյանը։ 

Ինչ վերաբերում է ոստիկանական բիրտ գործողություններին, Քոչարյանը նշեց, որ տեսանք ոստիկանական ուժերի բիրտ, ոչ համաչափ և լկտի պահվածքը, ինչը ցույց է տալիս, որ իշխանությունները սարսափած են, հասկանում են, որ ալիքը գնալով մեծանում է։

«Իրենք, վերևներում, միգուցե ամեն ինչի պատրաստ լինեն, բայց չեմ կարծում, որ ոստիկանները կգնան նման քայլերի»,- նշեց նա՝ հավելելով, որ դա կախված է նաև հավաքվածների վճռականությունից, բազմամարդությունից և փորձը ցույց է տալիս, որ, եթե տեսնում են հավաքվածները քիչ են՝ սկսում են իրենց լկտիությունն անել։

Անդրադառնալով հնարավոր բախումների վտանգին՝ Քոչարյանը նշեց, որ փորձում են վախ սերմանել մարդկանց մեջ, բայց նման բան չկա.

«Փորձելու են ուժ ցույց տալ, մենք էլ՝ պետք է մեր վճռականությունը ցույց տանք։ Ի վերջո, իրենք աշխատում, պայքարում են մի հոգու, մի դավաճանի աթոռի համար, մենք մտածելու բան չունենք, իրենք պետք է մտածեն»;

Լևոն Քոչարյանը նշեց, որ վտանգ չի տեսնում, կարծում է՝ արհեստական օրակարգ են փորձում մտցնել։

Աղբյուր` Փաստինֆո