Փաստ ինֆո

Իշխանական պատգամավորների հեգնական հայտարարությունները ընդդիմադիրների հասցեին, ինչպես նաև ոստիկանների գործադրած բիրտ ուժը ցուցարարների նկատմամբ, հենց իշխանության դեմ է աշխատելու: «Փաստինֆո»-ի հետ զրույցում նման տեսակետ է հայտնել քաղտեխնոլոգ Արմեն Բադալյանը:

Նշենք, որ երեկվանից ընդդիմությունը վրաններ է տեղադրել Ֆրանսիայի հրապարակում և համախոհների հետ գիշերել է այնտեղ: Այսօր վաղ առավոտից քաղաքացիները Երևանի մի շարք կենտրոնական փողոցներ տևական ժամանակ փակ են պահել: Մոտ 4 ժամ մայրաքաղաքը պարալիզացված է եղել։

Այս ընթացքում բազմաթիվ ահազանգեր հնչեցին, որ ոստիկանությունը բռնի ուժ է կիրառում ցուցարարների, լրագրողների և ընդդիմադիր պատգամավորների նկատմամբ:
Քաղտեխնոլոգ Արմեն Բադալյանի խոսքով՝ Հայաստանում, դեռևս 90-ականների առաջին կեսից, երբ ներքին գործերի նախարար դարձավ Վանո Սիրադեղյանը, Ոստիկանությունը իրավապահ համակարգից վերածվեց իշխանապահ համակարգի, և մշտապես ծառայել է տվյալ պահի իշխանությանը՝ բռնություններ կիրառելով տվյալ պահի ընդդիմության դեմ.

«Նույն այսօրվա ոստիկանները. 4 տարի առաջ ծեծում էին այսօրվա վարչապետին ու էլի մի քանի հոգու :

Բայց ոստիկանական բռնություններն այն ժամանակ չօգնեց, հիմա էլ չի օգնելու: Չգիտես ինչու, իշխանությանը թվում է, կարելի է ծեծել ընդդիմադիրներին և իրենց իշխանությունը պահել, բայց անընդհատ պարտվում են, սա երևույթ է, որ 30 տարի շարունակ բոլոր իշխանություններն անում են, պարտվում են, բայց դաս չեն քաղում, սա միշտ հակառակ արձագանքն է տվել»,-ասաց քաղտեխնոլոգը:

Ավելին՝ քաղտեխնոլոգը շեշտեց, որ ոստիկանական բիրտ ուժը մշտապես հակառակ ազդեցությունն է թողնում, ջղայնության և խիստ վերաբերմունք է առաջացնում հանրության մոտ.

«Դժգոհությունն էլ գրագետ օգտագործելու դեպքում ՝ ընդդիմությունը հաջողություններ կունեն կունենա»,-հավելեց զրուցակիցը:

Նշենք, նաև որ ընդդիմության երեկվա հանրահավաքից հետո ՔՊ-ական պատգամավորները տարբեր հեգնական գրառումներ են արել ընդդիմադիր գործիչների ելույթների և հանրահավաքի մասնակից քաղաքացիների մասին:

Քաղտեխնոլոգ Արմեն Բադալյանը մեզ հետ զրույցում ասաց, որ նախկինում էլ բոլոր իշխանական պատգամավորները, պաշտոնյաները, նույն հեգնական վերաբերմունքն էին ցուցաբերում ընդդիմության, նրանց աջակիցների նկատմամբ .

«Չգիտես ինչու՝ բոլորին, թվում է, թե իրենց իշխանությունը մնալու է, իսկ ընդդիմությունը պարտվելու է, բոլորին այդպես է թվում, բայց սխալվում են, իսկ սխալվելուց էլ դասեր չեն քաղում, նույնն էլ հիմա ՔՊ-ականները, հեգնական են արտահայտվում ընդդիմության մասին, իրենց թվում է, որ իրենց իշխանությունը շատ երկար է մնալու, ընդդիմությունը հաջողություն չի ունենալու: Սրանո իրենք անուղղակի ցույց են տալիս իրենց վերաբերմունքը իրենց շեֆին, տես ՝ ես հեգնում եմ ընդդիմությանը, պաշտոն տալիս՝ ինձ չմոռանաս:

Այսինքն կա ստորաքարշությունը ղեկավարի նկատմամբ»,-ասաց Բադալյանը:

Հանրության շրջանում, ինչպես նաև քաղաքական դաշտում, արդեն սկսվել են ժամանակավոր կառավարության վարչապետի թեկնածուների անուններ քննարկվել: Հիմնական քննարկվող թեկնածուն, կարծես, նախկին ՄԻՊ Արման Թաթոյանն է:

Արմեն Բադալյանը կարծում է, որ քանի դեռ հեռացված չէ գործող վարչապետ այդ հարցը քննարկելը դեռևս շուտ է.

«Միտումնավոր կերպով տարածվում են տեղեկություններ հատուկ կենտրոններից, թե արդեն կա ժամանակավոր կառավարության կազմը, սրանք PR տեխնոլոգիաներ են:

Իսկ ո՞վ ասաց, որ հենց նա է ժամանակավոր կառավարության վարչապետի թեկնածուն, գուցե այլ թեկնածուներ կան, իհարկե, սա չի նշանակում, որ դեմ եմ Թաթոյանի թեկնածությանը կամ կողմ եմ, քանի որ ես քաղաքական գործիչ չեմ: Իսկ որպես փորձագետ կարող եմ ասել, որ գաղտնիք չէ, որ Թաթոյանը հանրության մոտ բարձր վարկանիշ ունի , բայց իր թիկինքում էլ արդեն որոշակի քաղաքական ուժեր կան կանգնած, այնպես չի, որ ինքն անկախ թեկնածու է, որը ձեռք է տալիս բոլորին»,-ասաց Բադալյանը:

Աղբյուր` Փաստինֆո