Փաստ ինֆո

«Իշխանություններն իրենց հիմնական թեզով ժողովրդին անընդհատ ուզում են վախեցնել, այն է՝ եթե իրենք չեղան, տեղի է ունենալու պատերազմ։ Այսինքն՝ իշխանությունները Ալիևով շարունակում են վախեցնել մեր ժողովրդին»,- այսօր տեղի ունեցած մամուլի ասել է ԱԺ փոխխոսնակ, ՀՅԴ Հայաստանի ԳՄ ներկայացուցիչ Իշխան Սաղաթելյանը՝ պատասխանելով լրագրողների հարցերին։

«Եթե սրանք մնան, մենք կտոր -կտոր կորցնելու ենք Արցախը, Հայաստանն ու առհասարակ՝ Հայոց պետականությունը։ Ստեղծված իրավիճակից ելք կա։ Ո՛չ պատերազմը, ո՛չ էլ դրա արդյունքը ճակատագիր և դատավճիռ չեն։ Աշխարհում բազմաթիվ երկրներ կան, որոնք իրենց պատմության ընթացքում, ունեցել են պարտություններ, բայց որևէ երկրում պարտված իշխանությունը չի վերարտադրվել՝ կամ ինքնասպան է եղել, կամ ժողովուրդը նրանց հեռացրել է։ Եթե Հայաստանում լինի ազգային իշխանություն, ունենա կամք և վճռականություն, արդյունավետ կառավարում, մտածի, որ ելք կա, ապա մենք կարող ենք պահել և պաշտպանել մեր երկիրը»,- ընդգծել է Իշխան Սաղաթելյանը։

Խոսելով հավաքական ընդդիմության նախաձեռնած ցանցային պայքարի ձեռքբերումների մասին, Սաղաթելյանը նկատում է՝ անցնող շաբաթվա ամենամեծ ձեռքբերումն առաջին փուլի ամբողջական և արդյունավետ իրականացումն է. «Մենք, որպես քաղաքական ուժեր՝ մարդիկ, ովքեր պատասխանատվություն են կրում՝ երկրում ստեղծված իրավիճակի համար, իրենց առաջ խնդիր են դրել՝ կազմակերպել ժողովրդի ցասումն ու ընդվզումը։ Այս մասով՝ համարում եմ արդյունավետ աշխատանք ենք կատարել, իսկ այն իշխանությանը, որ, հետևողականորեն, երկիրը տանում է կործանման՝ օր առաջ պետք է կասեցնել և հեռացնել։ Վաղվանից մենք անցնում ենք վճռական պայքարի՝ շատ կարևոր փուլի մեկնարկի, որը կարճ ժամանակ հետո՝ բերելու է այս իշխանության հեռացմանը։ Կարճ ժամանակ անց, հայ ժողովուրդը կապացուցի, որ Նիկոլը մանդատ չունի, Նիկոլը լեգիտիմ չի, նա, հերթական անգամ, խաբել է մեր ժողովրդին և պետք է հեռանա։ Հանրային լայն ճնշման տակ՝ այդ պրոցեսն, արդեն, սկսված է»,- հայտարարել է ԱԺ փոխխոսնակը։

Մանրամասները՝ տեսանյութում

Աղբյուր` Փաստինֆո