Փաստ ինֆո

Եթե Նիկոլի եւ Ալիեւի «սիրավեպը չկասեցնենք, որը նրանք խաղում են մեր ազգային արժանապատվության հաշվին, ապա կշարունակենք կոնկրետ մարդկային եւ տարածքային կորուստներ ունենալ։ Այսօր ֆեյսբուքյան ուղիղ եթերում հայտարարել է ՀՀԿ փոխնախագահ Արմեն Աշոտյանը։

Ուղիղ եթերը հիմնականում վերաբերում էր արհեստածին Ադրբեջանի նախագահ Ալիեւի՝ նախօրեին հնչեցված հայտարարություններին։ «Ուզում եմ ձեզ հետ զրուցել մի շատ կարեւոր թեմայի շուրջ, որը վերաբերում է Ադրբեջանի նախագահի երեկվա ելույթին։ Կան մի շարք կարեւոր խնդիրներ, որոնց, ցավոք, հայկական կողմը, ինչպես եւ սպասվում էր, որեւէ կերպ չանդրադարձավ։ Մենք չունենք պետություն, չունենք մեր պետական ազգային օրակարգով զբաղվող պետական այրեր, չունենք վարչապետ, չունենք արտգործնախարար, չունենք Անվտանգության խորհրդի քարտուղար, չունենք խորհրդարանական դիվանագիտություն: Մենք ոչինչ չունենք, քանի որ մեզ ներկայացնող մարդիկ ոչնչություն են»,- ասաց քաղաքական գործիչը։ Մինչդեռ, ըստ նրա, չի կարելի անպատասխան թողնել, մասնավորապես արցախյան ազատագրական շարժման, պատերազմի մասին Ալիեւի մի շարք սադրիչ, մանիպուլյատիվ, կեղծ թեզերը, որոնցով փորձել է ապակողմնորոշել միջազգային հանրությանը։

Նա շատ հետաքրքրական անվանեց համաժողովը, որի ժամանակ ելույթ է ունեցել Ալիեւը։ Քաղաքական գործչի խոսքով՝ համաժողովը կազմակերպվել է Ադրբեջանի «նավթային, խավիարային» միջոցներով եւ անցկացվել է Բաքու հրավիրված «տարբեր տրամաչափի եւ տարբեր գործունեությամբ զբաղվող» մի քանի օտարերկրացիների մասնակցությամբ։
«Այսինքն՝ մինչ մենք փորձում ենք ազատվել Նիկոլից, ադրբեջանցիները քրտնաջան աշխատում են, ամրապնդում են իրենց դիրքերը, միջոցառումներ են կազմակերպում միջազգային հանրության համար»,- ասաց նա:

Տեսանյութում Աշոտյանը քաղաքական հերձման է ենթարկել Ալիեւի ստերը։ Նշենք, որ Ալիևը, մասնավորապես, հայտարարել էր, թե Ադրբեջանը ինքնուրույն իրականացրել է մադրիդյան սկզբունքները։ Այսինքն 44 օրյա պատերազմը հրահրել էր սկզբունքները իրացնելու համար, մինչդեռ Մադրիդյան սկզբունքներում ուղղակի բացառվում էր ռազմական ճանապարհը։

Մանրամասները՝ տեսանյութում

Աղբյուր` Փաստինֆո